काठमाडौँ । सरकारले संसदमा दर्ता गराएको विद्युत विधेयक, २०८० मा विरोध जनाउँदै नेपाल विद्युत प्राधिकरणका कर्मचारीहरूले आन्दोलन थालेका छन् ।
विधेयकले नेपाल विद्युत प्राधिकरणको अस्तित्व नै समाप्त पार्न खोजेको उनीहरूको आरोप छ । त्यसको विरोधस्वरुप आज उनीहरूले प्राधिकरणको केन्द्रिय कार्यालयमा प्रदर्शन गरेका थिए ।
विधेयकमा उत्पादन, वितरण र प्रसारण जस्ता अलगअलग कम्पनी स्थापना गर्ने र प्राधिकरण खारेज हुने प्रावधान राखिएको छ । कर्मचारीहरूले सीमित स्वार्थका लागि विद्युत प्राधिकरणलाई खण्डित पार्न खोजिएको भन्दै आन्दोलन सुरु गरेका हुन् ।
सीआईएनसँग कुरा गर्दै कर्मचारी सङ्घ आधिकारिक ट्रेड युनियनका महासचिव धिमन्तराज न्यौपानेले विधेयक फिर्ता नगरिएसम्म आन्दोलन जारी रहने बताउनुभयो ।
प्राधिकरणलाई छाता सङ्गठनको रूपमा राखेर त्यसको मातहतमा उत्पादन, प्रसारण र वितरण कम्पनी बनाइ विद्युत ऐन, २०८० लागु गरिए त्यो मान्य हुने कर्मचारीहरूले बताएका छन् ।
विद्युत् जस्तो अत्यावश्यक वस्तु निर्वाध रूपमा नेपाली जनतामा पुर्याउनुको सट्टा आफ्नो निहित स्वार्थ पूर्ति गर्न नीतिनिर्माताहरूले प्राधिकरणलाई विखण्डन गर्ने प्रयास गरेको महासचिव न्यौपानेले आरोप लगाउनुभयो ।
यसअघि सरकारले संसदमा दर्ता गरेको शिक्षा विधेयक र संसदमा दर्ताको तयारमिा रहेको निजामति सेवा विधेयकप्रति पनि सरोकारवालाहरूले असहमति राख्दै आन्दोलन गरेका थिए ।
प्रकाशित मिति: सोमबार, असोज २९, २०८०, १९:४८
