काठमाडौँ । नेपालमा विपद्का घटनामा परेर गएको वैशाखयता एक सय ४८ जनाको मृत्यु भएको छ । ३० जना वेपत्ता रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
प्राधिकरणका अनुसार ४ महिनामा विपद्का पाँच सय १० वटा घटना घटेका छन् । जसमा ४ सय ९६ जना घाइते छन् ।
विपद्का घटनामध्ये सबैभन्दा ठूलो मानवीय क्षति पहिरोले गरेको छ ।
प्राधिकरणका अनुसार पहिरोमा परी ४० जनाको मृत्यु भएको छ । लेक लागेर ५, बाढीमा परेर ११, चट्याङ लागेर ३१, सर्पको टोकाइबाट ६, आगलागीमा परेर २४, जनावरको आक्रमणबाट १४, हिमपहिरोमा परी १२ र भारी वर्षाका कारण एकजनाको मृत्यु भएको प्राधिकरणले जनाएको छ ।
विपद्का कारण दुई सय ४० परिवार प्रभावित भएका छन् । प्राधिकरणका अनुसार विपद्का घटनाले वैशाखयता एक अर्ब १८ करोड १८ लाख १५ हजार ३४७ रुपैयाँ बराबरको आर्थिक क्षति गरेको छ ।
प्रकाशित मिति: शनिबार, भदौ २, २०८०, १४:०१
