डोटीमा भूकम्पमा परेर ६ जनाको मृत्यु भएको छ भने ५ जना घाइते भएका छन् ।
आज बिहान २ बजेर १२ मिनेटमा डोटीको खप्तड राष्ट्रिय निकुञ्ज केन्द्रविन्दु भएर गएको ६ दशमलव ६ रेक्टर स्केलको भूकम्पका कारण पूर्वीचौकी गाउँपालिका–३ गैरागाउँमा घर भत्कँदा ६ जनाको मृत्यु भएको जिल्ला प्रहरी कार्यालय डोटीले जनाएको छ ।
सीआईएनसँग कुरा गर्दै डोटीका प्रहरी नायव उपरीक्षक भोलाकुमार भट्टले भूकम्पले पदम बोहराको घर भत्किँदा बोहराका श्रीमति भगवतीदेवी, छोरी सीता र छोरा हर्कको मृत्यु भएको जानकारी दिनुभयो ।
‘स्थानीय प्रेम बोहराको घर भत्कँदा बोहरासहित उहाँको छोरी तुलसी र उहाँको घरमा बस्न आएकी धनसरी बोहराको घटनास्थलमै मृत्यु भएको छ । एक जना बालकको भने उद्धार गरिएको छ ।’ प्रहरी नायव उपरीक्षक भट्टले भन्नुभयो ।
घाइते ५ जनालाई उपचारको लागि अस्पताल पठाइएको छ । हिजो राति ९ बजेर ७ मिनेटमा डोटीको खप्तड राष्ट्रिय निकुञ्ज नै केन्द्रविन्दु भएर ५ दशमलव ७ रेक्टर स्केलको भूकम्प गएको थियो ।
राति नै ९ बजेर ५६ मिनेटमा पनि ४ दशमलव १ रेक्टर स्केलको भूकम्प गएको थियो । लगातारको भूकम्पले जोखिममा रहेका घर बिहान भत्किएको प्रहरीको भनाइ छ ।
आज बिहान बाजुराको खण्डभ्यू केन्द्रविन्दु भएर ३ दशमलव ९ रेक्टर स्केलको भूकम्प गएको केन्द्रले जनाएको छ ।
ठूला भूकम्पपछि साना परकम्प आउँने जोखिम लामो समयसम्म रहने भएकाले सतर्कता भने अपनाउनुपर्ने केन्द्रका भूकम्पविद् भरतप्रसाद कोइरालाले सीआईएनलाई बताउनुभयो ।
नेपाल भूकम्पको जोखिममा सधैँ रहेको भन्दै उहाँले सतर्कता अपनाउन अनुरोध गर्नुभयो ।
प्रकाशित मिति: बुधबार, कात्तिक २३, २०७९, ०६:५४
