जाजरकोट । जाजरकोटमा जिल्लाभर लम्पी स्किन रोगले प्रकोपको रूप लिएको छ । यो रोगबाट हालसम्ममा जिल्लाभर ३ सयभन्दा धेरै पशुचौपाया मरेका छन् ।
पशुचौपायाको घाँटी, पुच्छर वरिपरिको भाग, पेट, थुनलगायत शरीरका विभिन्न भागमा गिर्खा देखा पर्ने, उच्च ज्वरो आउने, आँखामा कचेरा लाग्ने, सिगान बग्ने तथा मुखबाट फिँज धेरै निकाल्ने र अन्तमा मृत्यु हुने गरेको छ ।
खेतीपाती भित्राउने र लगाउने बेला पशुवस्तु विरामी परेपछि स्थानीयबासी चिन्तित छन् ।
पशु अस्पताल तथा पशु सेवा कार्यालय जाजरकोटका अनुसार हाल जिल्लाभर ८ हजार ६ सय ३० वटा पशुचौपाया लम्पि स्किनको सङ्क्रमण देखिएको छ ।
जसमध्ये छेडागाड नगरपालिकामा ४ हजार ३७ पशुचौपाया सङ्क्रमित छन् भने ६१ वटा मरेका छन् । नलगाड नगरपालिकामा १ हजार २ सय पशुचौपाया सङ्क्रमित छन् भने ३४ वटा मरेका छन् ।
भेरी नगरपालिकामा १ हजार १ सय ५ पशुचौपाया सङ्क्रमित भएका छन् भने १ सय ५ वटा मरेका छन् । शिवालय गाउँपालिकामा २ सय ५० वटा पशुचौपाया सङ्क्रमित भएका छन् भने २७ वटा मरेका छन् ।
जुनिचाँदे गाउँपालिकामा १ हजार ८ सय ४७ सङ्क्रमित भएका छन् भने १ सय ४३ पशु मरेका छन् । बारेकोट गाउँपालिकामा १ सय ४० सङ्क्रमित भएका छन् भने १२ वटा मरेका छन् ।
कुशे गाउँपालिकामा ९० वटा सङ्क्रमित भएका छन् भने ५ वटा मरेका छन् ।
लम्पि स्किन रोग सुरुमा भेरी नगरपालिकामा देखिएको थियो ।
भेरीबाट सुरु भएको रोग जिल्लाका साथै स्थानीय तहमा महामारीका रूपमा फैलिरहेको पशु अस्पताल तथा पशु सेवा कार्यालय जाजरकोटका प्रमुख कलम बहादुर महताराले बताउनुभयो ।
रोगको प्रकोप बढ्दै गएकोले यसको नियन्त्रण गर्नेका लागि विभिन्न पालिकाका प्राविधिकहरू परिचालन गरिएको छ ।
प्रकाशित मिति: शनिबार, वैशाख ३०, २०८०, १४:२२
