हुम्ला । हुम्लाको चङ्खेली गाउँपालिका–५ नेप्का गाउँमा आएको बाढीपहिरोले डाँफे आधारभूत विद्यालय बगाएको छ ।
खेतीयोग्य जग्गा र गोठ बगाएको प्रारम्भिक जानकारी आएको चङ्खेली गाउँपालिका वडा नम्बर ५ का बासिन्दा छक्कबहादुर तामाङले बताउनुभयो ।
वडाध्यक्ष हर्कधन तामाङ र धनसिंह तामाङका गोठ पनि पहिरोले पुरेको छ । त्यसबाट भेडाबाख्रा पनि बगेको जनाइएको छ ।
असिनापानीपछि गएराति साढे ११ बजेतिर गएको बाढी, पहिरोले गोठ पुरिए पनि कति क्षति भयो भन्ने यकिन गर्न नसकिएको तर मानवीय क्षति भने नभएको जिल्ला प्रहरी कार्यालयका प्रमुख, डीएसपी शङ्कर खड्काले बताउनुभयो ।
उहाँका अनुसार प्रहरीको टोली बिहान ११ बजेसम्म घटनास्थलमा पुगेपछि एकिन विवरण आउनेछ । वडाअध्यक्ष तामाङका अनुसार गोघ पुरिँदा भेडाबाख्रा पुरिएका छन् भने कोदो खेती हुने धेरै जग्गा बाढीले बगाएको छ ।
हुम्ला सदरमुकाम सिमकोटदेखि उत्तरपूर्वमा रहेको चङ्खेली गाउँपालिकाको तल्लो पाली, माथिल्लो पाली, पिप्लाङ र नेप्का गरी चार गाउँ मध्ये गाउँपालिकाको केन्द्र पिप्लाङ भन्दा निकै टाढा रहेको नेप्का गाउँ पुग्न पैदल हिड्दा करिब ५ घण्टा लाग्छ ।
प्रकाशित मिति: बुधबार, जेठ ६, २०८३
