हुम्ला। आगामी चैत १९ गतेदेखि सञ्चालन हुने माध्यमिक शिक्षा परीक्षा (एसईई) मा हुम्ला जिल्लाबाट १३ सय जना विद्यार्थीले सहभागिता जनाउने भएका छन् ।
निमित्त शिक्षा विकास तथा समन्वय इकाई हुम्लाका प्रमुख खड्गबहादुर हमालकाअनुसार जिल्लाभर रहेका ३२ वटा माध्यामिक विद्यालयका ७ वटा परिक्षा केन्द्र गरी एक हजार १३ सय जना विद्यार्थीहरु सहभागिता जनाउने बताउनुभयो ।
जिल्लाभरका ३२ वटा माध्यामिक विद्यालयहरुमा अध्ययनरत विद्यार्थीको आधारमा ७ वटा परिक्षा केन्द्र निर्धारण गरीएको छ। सात वटा स्थानीय तह भएको हुम्लामा नाम्खा र चंखेली गाउँपालिकाबाहेक अन्य पाँच गाउँपालिकामा परिक्षा केन्द्रहरु रहेका छन् । सिमकोट र सर्केगाड गाउँपालिकामा २।२ वटा परिक्षा केन्द्रहरु छन् भने अन्यमा १।१ रहेका छन्।
परिक्षा केन्द्रहरुमा सिमकोट गाउँपालिकाको बालमन्दिर माबिमा नियमित तर्फ १ सय ३३ र ग्रेड बृद्धि तर्फ ३२ जना गरी १ सय ६५ जना रहेका छन् । त्यस्तै सोही गाउँपालिकाकै मानसरोबर माध्यामिक बिद्यालयमा नियमित तर्फका १ सय ४३ र ग्रेड वृद्धि तर्फका ९९ गरी २ सय ४२ जनाले सहभागिता जनाउने भएका छन् ।
हिमज्योति माध्यामिक बिद्यालय सर्केगाड केन्द्रमा १ सय ९१ जना नियमित र २२ जना ग्रेड बृद्धिका गरी २ सय १३ जना परिक्षार्थी रहेका छन्, कोट मावि रोडिकोटमा १ सय ६ जना नियमित तर्फका विद्यार्थीहरु छन् भने ग्रेडबृद्धिका विद्यार्थी नभएको बताउनु भएको छ ।
जिल्लाको तल्लो क्षेत्रमा रहेको सुर्योदय माध्यामिक विद्यालयमा १ सय ४० जना नियमित तर्फका विद्यार्थीहरु रहेका छन् भने ३६ जना ग्रेड बृद्धिका गरी १ सय ७६ जना रहेका छन्, मदनदेब माविमा २ सय ५ नियमित र ८७ जना ग्रेड बृद्धिका गरी २ सय ९२ जना र सिता मावि खार्पुनाथमा ७९ नियमित तथा २७ जना ग्रेड बृद्धि गरी १ सय ६ जना गरी १३ सय जना परिक्षामा सहभागि हुँने बताउनु भयो ।
परिक्षालाई मर्यादित बनाउनको लागि जिल्लाका ७ वटै गाउँपालिकाका शिक्षा युवा तथा खेलकुद शाँखाका प्रमुखहरुसँग समन्वय भइरहेको बताउँदै प्रश्नपत्र सम्बन्धीत स्थानीय तहका प्रहरी चौकीमा र उत्तरपुस्तिका सम्बन्धीत परिक्षा केन्द्रमा पुगिसकेको निमित्त इकाई प्रमुख हमालले बताउनु भयो ।
गत वर्ष चैत्र ७ गतेबाट भएको परिक्षामा १ हजार १ सय ४ जना सहभागी भएका थिए ।
प्रकाशित मिति: सोमबार, चैत १६, २०८२
