हुम्ला । हिमाली जिल्ला हुम्लाका चार वटा मतदान केन्द्रमा खटिएका कर्मचारी र मतपत्रलगायतका बन्दोबस्तीका सामग्री आज हेलिकोप्टरबाट ढुवानी हुने भएको छ ।
नाम्खा गाउँपालिका– ६ को हिमालपारीको गाउँ लिमीको भृकुटी आधारभूत विद्यालय जाङ, सुनखानी आधारभूत विद्यालय हल्जी, हिमशिखर आधारभुत विद्यालय तील सोही गाउँपालिका– ४ को हिमालय आधारभूत विद्यालय चाला मतदान केन्द्रमा मतदान कार्यका लागि खटिएका कर्मचारी र मतपत्रलगायतका सामग्री हेलिकोप्टरबाट पठाउन लागिएको प्रमुख जिल्ला अधिकारी टेककुमार रेग्मीले बताउनुभयो ।
उहाँका अनुसार यी चारवटै मतदान केन्द्रमा हिमपातले यातायात सेवा अबरुद्ध भएको कारण ४ वटा मतदान केन्द्रका गरी २० जना कर्मचारीहरु, नेपाली सेना, निर्वाचन प्रहरी, नेपाल प्रहरीसहितका सुरक्षाकर्मीहरु ८० जना गरी १ सय २ जना कर्मचारी र मतपत्रलगायतका निर्वाचन सामाग्री आज र भोलिमा ओसार्ने तयारी गरिएको छ ।
लिमी जाने दुई वटा नाकाहरु नारा र न्यालु लेकको सडकमा हिउ जमेको कारण बन्द भएपछि निर्वाचन आयोगले हेलिकोप्टरको प्रयोग गर्न अनुमति दिएको हो ।
चाला जाने बाटोमा पनि हिउ जमेर घोडेटो बाटो अबरुद्ध भएकोले पनि सो मतदान केन्द्रमा पनि हेलिकोप्टरको ब्यवस्था गर्न लागिएको हो । ती मतदान केन्द्रहरु भौगालिक कारणले जिल्ला सुरक्षा समितिले अति सम्वेदनशील रहेको औँल्याएको थियो ।
प्रकाशित मिति: आइतबार, फागुन १७, २०८२
