हुम्ला । आगामी फागुन २१ गते हुने प्रतिनिधि सभा निर्वाचनको लागि कायम गरिएका ६४ मतदान केन्द्रमध्ये तीन सय भन्दा कम मतदाता भएका १५ मतदान केन्द्र रहेका छन् ।
३४ हजार ३ सय ७२ मतदाता भएको उक्त जिल्लाका ६४ मतदान केन्द्रमध्ये सबै भन्दा कम जिल्लाको तल्लो क्षेत्र ताँजाकोट गाउँपालिका वडा नम्बर ३ मा रहेको बानादेव आधारभूत विद्यालयमा रहेको मतदान केन्द्रमा जम्मा ५४ मतदाता रहेका छन् ।
यो ठाउँमा पुग्न गाउँपालिकाको केन्द्रबाट पैदल एक दिन लाग्छ । सडक सञ्जालले छोएको छैन । सर्केगाड गाउँपालिकामा ३ सय भन्दा कम मतदाता रहेका मतदान केन्द्र ३ वटा रहेका छन् ।
वडा नम्बर १ को देबल आधारभूत विद्यालय तुम्च मतदान केन्द्रमा २ सय ४०, धुमचुली आधारभुत विद्यालय कल्लास मतदान केन्द्रमा २ सय १६ र नीलकण्ठ प्रावि फुचा मतदान केन्द्रमा २ सय ८८ जना मतदाता रहेको जिल्ला निर्वाचन अधिकारी भीमबहादुर रोकायाले बताउनुभयो ।
चङ्खेली गाउँपालिकामा पनि ३ वटै मतदान केन्द्र रहेका छन् । सबैभन्दा टाढा डाँफे आधारभूत विद्यालय नेप्का मतदान केन्द्रमा २ सय ४२ मतदाता रहेका छन् ।
उक्त गाउँमा जान गाउँपालिकाको केन्द्रबाट पैदल यात्रा गर्दा एक दिन लाग्छ । त्यहाँ पनि सडक पुगेको छैन ।
रारा आधारभूत विद्यालय मेखाला मतदान केन्द्रमा १ सय ४३ जना र रामशाह आधारभूत विद्यालय पिपलाङ मतदान केन्द्रमा २ सय १२ जना मतदाता रहेका छन् ।
अन्य ८ वटा मतदान केन्द्र भने जिल्लाको उत्तरी क्षेत्रमा रहेको नाम्खा गाउँपालिकामा रहेका छन् ।
सबै भन्दा टाढा रहेको हिमशिखर प्राबी तिल गाउँ मतदान केन्द्रमा १ सय ३२ जना, भृकुटी प्रावी जाँङ गाउँ मतदान केन्द्रमा २ सय ४७ जना र सुनखानी प्रावि हल्जी मेतदान केन्द्रमा २ सय ९३ जना मतदाता रहेका छन् ।
यी तीनै गाउँमा यतिबेला १५/२० जना बाहेक अन्य सबै जिल्ला सदरमुकाम वा अन्य सहरी क्षेत्रमै रहेका छन् ।
अरनिको प्राबि यारी मतदान केन्द्रमा १ सय ९५ जना, खासरपानी प्राबी मतदान केन्द्र मुचुमा २ सय ३४ जना, हिमालय प्रावि चालामा १ सय ५९, महावौद्ध मावि याल्वाङ्मा २ सय ८० र नमोडोछोमु प्रावि ताङ्घीन मतदान केन्द्रमा १ सय ५९ मतदाता रहेका छन् ।
यी सबै मतदान केन्द्रमा यतिबेला हिउ जमेको छ भने केही मतदान केन्द्रमा जान यारी र न्यालुको लेखमा भएको हिउको कारण समस्या रहेको मुख्य निर्वाचन अधिकृत बरालले बताउनुभयो ।
प्रकाशित मिति: बुधबार, फागुन १३, २०८२
