हुम्ला । हवाइ टिकट सहज र पारदर्शी बनाउनुपर्ने भन्दै हुम्लाका तीन एयरलाइन्स कार्यालयमा लगाइएको ताला खुलेको छ ।
जिल्ला सदरमुकाम सिमकोट गाउँपालिका वडा नम्बर ५ का युवाहरूले हवाइ टिकट वितरणमा पारदर्शी नगरी मिलोमतोमा वितरण गरेको आरोप लगाउँदै हिजो शनिवार बिहान ताला लगाएका थिए ।
प्रमुख जिल्ला अधिकारी टेककुमार रेग्मीको अध्यक्षतामा बसेको सर्बदलीय, सर्बपक्षीय बैठकको निर्णयपछि लगाइएको ताला खोलिएको हो ।
जिल्लामा उपलब्ध राजीनितिक दलका प्रमुख एवं प्रतिनिधिसहित जनप्रतिनिधिहरूको उपस्थितिमा सम्पन्न बैठकल प्रत्येक उडानमा दुई वटा टिकट बिरामीलाई अनिवार्य वितरण गर्ने, तीन वटा सरकारी कर्मचारीहरूको लागि जिल्ला प्रशासन कार्यालयले सिफारीस गर्ने, तीन सिट एयरलाइन्सले अग्रीम सूचना जारी गरी अनलाइन माध्यमबाट वितरण गर्ने निर्णय भएको प्रमुख जिल्ला अधिकारी रेग्मीले बताउनुभयो ।
सिमकोट गाउँपालिका– ५ र ६ का स्थानीयहरूको लागि वडा कार्यालयको सिफारीसमा एकएक टिकट गरी दस सिट वितरण गर्ने र बाँकी टिकट एयरलायन्सले प्राथामिकता र सहजताको आधारमा वितरण गर्ने निर्णय भएको उहाँको भनाइ छ ।
सिमकोट गाउँपालिका वडा नम्बर ५ र ६ ले पहिलो पटक आरक्षण सिट पाउने निर्णय गरिएको छ ।
१५ सिट भएको हवाईजहाजमा यस अघि भनसुनका आधारमा टिकट वितरण हुँदै आएको थियो । यो तालिका सिमकोट विमानस्थलमा उडान भर्ने सीता, समिट, तारा र नेपाल एयरलाइन्सका सबै उडानमा कार्यान्वयन हुने जनाइएको छ ।
भएका निर्णयहरू
-1763258958.jpg)
प्रकाशित मिति: आइतबार, कात्तिक ३०, २०८२
