देउसी भैलोबाट उठाएको रकमले बाटो मर्मत गरिएको छ । देउसी भैलो मनोरञ्जनदेखि विलासी खर्च गर्नको लागि खेल्ने गरिएको भए पनि पछिल्लो समय केही देउसी भैलो खेल्ने समूहहरूले मनोरञ्जन मात्रै नभएर विकास निर्माणमा लगानि गर्न थालेका हुन् ।
हुम्लाको अदानचुली गाउँपालिका वडा नम्बर १ तल्लो कल्खे गाउँका युवाहरू मिलेर गएको तिहारमा देउसी भैलो खेलेर उठाएको रकमले दैनिक आवतजावत गर्ने बाटो मर्मत गरिएको उक्त समूहका संयोजक वर्ष महताराले बताउनुभयो ।
गत वर्ष दैनिक पशुचौपाया हिड्ने तलिखोलाको बाटो मर्मत गरेका यो समूहले यस वर्ष स्यालखेत खानेपानीको बाटो मर्मत गरिएको महताराले बताउनुभयो ।
पछिल्लो समय दुर्गम क्षेत्रहरुमा विकास योजनाहरु आफै नआउने र ल्याउनु परे कमिशन दिएर ल्याउनुपर्ने तथा सानातिना विकासका योजनाहरू पनि नआउने उनीहरूको गुनासो छ ।
मुगु जिल्लाको भिई, सोरु गाउँपालिकाको मुख्य बजार क्षेत्र, तुम्च र हुम्लाको आफ्नै गाउँमा देउसीभैलो खेलि करिब ३५ हजार सङ्कलन भएकामा १३ जना युवाहरूको खाना खर्च कटाएर बाँकी भएको पैसाले गाउँवासीलाई खाजा खुवाएर बाटो मर्मत गरिएको हो ।
दैनिक खानेपानी ल्याउने, पशुचौपाया हिड्ने बाटो गएको बैशाखमा आएको बाढीले भत्काएको थियो ।
प्रकाशित मिति: सोमबार, कात्तिक १७, २०८२
