हुम्ला । हुम्लाको चंखेली गाउँपालिकामा बोलेरो जिप दुर्घटना हुँदा ३ जनाको मृत्यु भएकोे छ । यस्तै, ९ जना घाइते भएका छन्।
दुर्घटना आज बिहान करिब साढे १० बजे गाउँपालिकाको केन्द्र पिप्लाङ नजिकै गोरु ठेक्नामा भएको हो। मेल्छामबाट पिप्लाङतर्फ जाँदै गरेको बोलेरो जिप करिब ३ सय मिटर तल खस्दा बोलेरोमा सवार १२ जनामध्ये ३ जनाको मृत्यु भएको जिल्ला प्रहरीका कार्यालय हुम्लाका उपरिक्षक शंकर पोखरेलले बताउनुभयो ।
मृत्यु हुनेमा ग्लोबल बैंक कालीकोटमा कार्यरत २७ वर्षीय मनविर बुढा, स्याडा स्वास्थ्य चौकीमा कार्यरत ३० वर्षीया अनमी बसन्ती बुढा र उहाँका २ वर्षीय छोरा देवाङस बुढा छन्।
दुर्घटनामा वडा नम्बर ६ का अध्यक्ष जयबहादुर शिराका छोरा कैलाश शिरा र छोरी पार्वती शिरा पनि गम्भीर घाइते भएका छन्। उनीहरू दशैं मनाएर घर फर्किंदै गर्दा दुर्घटनामा परेका हुन्। गम्भीर घाइते भएका सात जनालाई नेपाली सेनाको हेलिकप्टरमार्फत सुर्खेतको प्रदेश अस्पताल कालागाउँमा लगिएको छ। तीमध्ये जिपका मालिक बहादुर लामा, बिमला बुढा, नर्सिङ स्टाफ बेलसरा बुढा र मदन लामा पनि छन्।
सामान्य घाइते भएका हंस लामा र दिपेन्द्र सिंहको मेल्छाम स्वास्थ्य चौकीमा उपचार भइरहेको छ। प्रहरीका अनुसार दुर्घटनाको कारण अनियन्त्रित गति हुन सक्ने अनुमान गरिएको छ। घटनाको थप अनुसन्धान भइरहेको छ।
प्रकाशित मिति: शुक्रबार, असोज २४, २०८२
