नवलपरासी । नवलपरासीको सुनवलमा देशकै पहिलो “भजन घर” स्थापना गरिएको छ।
लोक संस्कृतिको संरक्षण र प्रवद्र्धन गर्ने उद्देश्यले भजन घर सुरु गरिएको हो। भजन टुक्का धार्मिक, सामाजिक र सांस्कृतिक परम्परासँग जोडिएको परम्परा हो, जसले संगीतको माध्यमबाट एकता, मेलमिलाप र धार्मिक सहिष्णुतालाई बढाउँछ।
नेपालमै पहिलो भजन घर सुनवल नगरपालिका–१ मा राष्ट्रिय लोक भजन चुड्का संस्कृति संरक्षण प्रतिष्ठान, सुनवल नगर कार्यसमितिले स्थापना गरेको हो। उद्घाटन कार्यक्रम प्रतिष्ठानका अध्यक्ष रमेश तिवारीको अध्यक्षतामा र नगरप्रमुख बिमला अर्यालयको प्रमुख आतिथ्यमा सम्पन्न भयो।
भजन टुक्कामा मादल, झ्याली, मञ्जिरा, हार्मोनियम, तबला, ढोलक, सारङ्गी र शङ्ख जस्ता परम्परागत बाजा बजाइन्छ। यी वाद्ययन्त्रले भजनलाई ताल र लय दिन्छन् र सामूहिक गायनमा रमाइलो वातावरण सिर्जना गर्छन्।
भजनका विषयवस्तुमा भगवानको महिमा, धार्मिक कथा, सामाजिक जीवनका अनुभव, वातावरण र प्रकृति सम्बन्धी सन्देश समावेश गरिन्छ।
कार्यक्रममा प्रतिष्ठानका केन्द्रीय अध्यक्ष नारायण लेकाली, लुम्बिनी प्रदेश अध्यक्ष काशीराम पोखरेल, नवलपरासी जिल्ला अध्यक्ष तीर्थ सापकोटा लगायतले शुभकामना दिएका थिए। कार्यक्रममा केही अतिथिहरूले भजन टुक्का गाएर मनोरञ्जन पनि प्रदान गरेका थिए।
प्रतिष्ठानका सचिव हरिप्रसाद तिवारीका अनुसार सुनवल–१ मा रहेको भजन घरमा प्रत्येक शुक्रबार नियमित भजन कार्यक्रम सञ्चालन गरिनेछ।
प्रकाशित मिति: शनिबार, साउन १७, २०८२
