गुनासो
एउटा छोरो जो कहिल्यै
शहरबाट गाउँ फर्केन
एउटा छोरो जो कहिल्यै
गाउँबाट शहर छिरेन
खै किन हो बुवा दुवैसँग रिसाएका छन् ?!
°°°
जिम्मेवारी
बुवाले सिकाइरहे
व्रतको महत्व
आमाले सिकाइरहनुभयो
खानाको माहात्म्य ।
°°°
डर
निषेध गरेको छु
आफूलाई
मायाको जङ्गलमा पस्न
आफ्नो जलिरहेको हृदय बोकेर ।
°°°
प्राथमिकता
डाँफेको खोजीमा
निस्केको हिमाल
अल्झियो सरकारको नृत्यमा !
°°°
नियत
बाँध्न छोडेर
देशको घाउमा पट्टी
सरकार बाँधीरहेछ
पट्टी देशको आँखामा !
°°°
गल्ती
हिजोसम्म त्यागेर गुलियो
जो बाँचिरहेथ्यो मधुमेहबाट
त्यही मान्छे मरिरहेछ आज
चाखेर नेताको मिठो जिब्रो !
°°°
जिज्ञासा
सरकारसँग छैनन्
जनताका प्रश्नका उत्तरहरू
जनतासँग छैनन्
सरकारका उत्तरका प्रश्नहरू
मेरो देश अब कसरी उत्तीर्ण होला ?!
°°°
प्रवृत्ति
हिजो जसले बेचे
मदिराको लागि बुढी औँला
तिनी आज लेखिरहेछन्
बचेका औँलाले दानापानी ।
°°°
परिस्थिति
बेला बेला
बुवाले नै किनिदिनु हुन्छ
छोराको लागि जुत्ता र चप्पल
एउटा कारण यो पनि हो
छोरा आफ्नो खुट्टामा उभिन नसक्नुको ।
°°°
शङ्का
कतै नभएर पनि
हुनुभन्दा
खतरनाक हुँदोरहेछ
कतै भएर पनि नहुनु
यतिबेला म खतरामा छु ।
°°°
प्रकाशित मिति: शुक्रबार, कात्तिक १०, २०८०, ०९:२३
