ओखलढुंगा । ओखलढुंगामा पहिरोमा परेर एकै परिवारका चार जनाको मृत्यु भएको छ । गए राती पहिरोले घर बगाउँदा हराइरहेका २ जनाको पनि शव भेटिएपछि मृतकको सङ्ख्या ४ पुगेको हो ।
बिहीबार राति चम्पादेवी गाउँपालिका–८ विलन्दुमा पहिरोले घर बगाउँदा ३६ वर्षीय रणबहादुर गुरुङ सहित उहाँकी २९ वर्षीय श्रीमती शिवमाया, १० वर्षीय छोरा दिनेश र १८ महिनाकी छोरी कृतिका गुरुङको मृत्यु भएको जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले जानकारी दिनुभयो ।
राती ११ बजेतिर बस्ती माथिबाट आएको पहिरोले चार घर बगाएको थियो । पहिरोले बलबहादुर गुरुङ र जरसिंह गुरुङको घर पनि बगाएको छ । ती घरमा रहेकाहरूले भने भागेर ज्यान बचाउन सफल भएका हुन् ।
एकै परिवारका चार जनाको मृत्यु भएपछि विलन्दु गाउँ शोकमा परेको छ ।
२०७२ को भूकम्पले धाँजा फाटेको जमिनमा पानी पसेर पहिरो जाँदा जनधनको क्षति भएको हुनसक्ने प्रहरीको प्रारम्भिक अनुमान छ। पहिरो गएको क्षेत्रलाई भूकम्पपछि जोखिमयुक्त क्षेत्र घोषणा गरिएको थियो।
प्रकाशित मिति: शुक्रबार, असार ८, २०८०, १२:४१
