धनकुटा । तिहारका लागि रोपेका फूल नफुल्दा धनकुटाका किसानलाई लाखौँ रुपैयाँ घाटा हुने भएको छ । तिहार सुरु हुनै लागे पनि व्यावसायिक रूपमा खेती गरिएको सयपत्री फूल फुलेको छैन ।
सयपत्री फूलको पकेट क्षेत्र मानिने जिल्लाको स्याउले, लाँकुरे र सिप्तेनमा तिहार लक्षित फूल नफुलेपछि किसानलाई आर्थिक घाटा पनि हुने भएको छ ।
१० रोपनीमा जग्गामा सयपत्री फूल खेती गरेका धनकुटा नगरपालिका ३, सिप्तेनका रेसबहादुर राईले यस पटक तिहारका लागि भनेर लगाएको फूल नफुल्ने भएकाले घाटा लागेको बताउनुभयो । उहाँले फूल बेचेरै वर्षमा एक लाख ५० हजार रुपैयाँ आम्दानी गर्दै आउनुभएको थियो ।
५ रोपनी जग्गामा फूल खेती गरेकी सिप्तेनकै शुकमाया राई पनि फूल नफुलेपछि निराश हुनुहुन्छ । तिहार नजिकिँदै गर्दा पनि फूल नफुलेपछि, चाडपर्वको खर्च जोहो गर्ने चिन्ता मात्र होइन खेतीका लागि गरेको खर्च पनि नउठ्ने भएकाले उहाँको चिन्ता थपिएको हो ।
धनकुटाको स्याउले, लाँकुरे र सिप्तेन क्षेत्रका सयभन्दा बढी किसान समयमा सयपत्री फूल नफुलेका कारण चिन्तित छन् । एक सय ४० रोपनी क्षेत्रफलमा लगाइएको फूल नफुलेपछि ५० लाख बराबरको नोक्सानी हुने किसानको भनाइ छ ।
कृषि ज्ञान केन्द्र धनकुटाका अनुसार मौसम परिवर्तन, कृषि बालीमा अधिक विषादीको प्रयोग र समयमा वर्षा नहुँदा यसपटक तिहारमा सयपत्री फूल नफुल्ने भएको हो ।
प्रकाशित मिति: बिहीबार, कात्तिक ३, २०७९, ११:४३
