काठमाडौँ । आज बिहान करिब ९ बजे रसुवामा अचानक आएको आएको बाढीले टिमुरे, स्याफ्रुबेसीलगायतका क्षेत्रदेखि खोला किनाराका क्षेत्रमा ठूलो क्षति पुर्याएको नेपाली सेनाले जनाएको छ ।
खोज तथा उद्धारका लागि नेपाली सेनाको दुई वटा हेलिकप्टर त्रिशूली पुगेको छ भने त्रिशूलीस्थित जिल्ला अस्पताललाई सहयोग पुर्याउन नेपाली सेनाको इमर्जेन्सी मेडिकल रेस्क्यू टीम हेलिकप्टरसहित त्यसतर्फ गएको सैनिक जन सम्पर्क तथा सूचना निर्देशनालयले जनाएको छ ।
धुन्चे र त्रिशूली ब्यारेकबाट पनि उद्धार टोली प्रभावित इलाकामा खटिएको छ भने गजुरीस्थित नं. ६ बाहिनी अड्डाबाट विपत् व्यवस्थापनको दक्ष जनशक्ति समेत खटिएको जनाइएको छ।
बाढीका कारण त्रिशूली र नारायणी नदीको तटीय इलाकामा बसोबास गर्ने सबैलाई सतर्कता अपनाउन आग्रह गर्दै प्रभावितहरूको उद्धारका लागि सहकार्य गर्न समेत नेपाली सेनाले अनुरोध गरेको छ ।
प्रकाशित मिति: बुधबार, भदौ १०, २०८३
