काठमाडौँ । नेपालको आतिथ्य तथा पर्यटन उद्योगमा केही व्यक्तित्वहरू यस्ता छन्, जसले आफ्नो जीवनलाई केवल व्यक्तिगत सफलतामा सीमित नराखी सम्पूर्ण उद्योगको विकास, मानव संसाधन निर्माण र सेवा संस्कृतिको प्रवर्द्धनमा समर्पित गरेका छन् ।
काशीराम अधिकारी त्यस्तै प्रेरणादायीमध्येको एक हुनुहुन्छ ।
२०३४ साल असार २९ गते दाङ जिल्लाको तुलसीपुर–४, बनहरीमा जन्मनुभएका काशीराम अधिकारी आज नेपालको अग्रणी होटल समूह लुम्बिनी ग्रीन होटल्स एण्ड रिसोर्ट्सका ग्रुप प्रमुख कार्यकारी अधिकृतको भूमिकामा पुग्नुभएको छ ।
उहाँका अनुसरा यो सफलताको यात्रा भने सहज थिएन । दाङको साधारण ग्रामीण परिवेशमा हुर्किनुभएका अधिकारीले बाल्यकालदेखि नै मेहनत, अनुशासन र इमान्दारितालाई जीवनको आधार बनाउनुभयो ।
परिवारबाट प्राप्त संस्कारले उहाँलाई सधैं जिम्मेवारीप्रति प्रतिबद्ध रहन सिकायो ।
राम्रो भविष्य निर्माण गर्ने सपना बोकेर उहाँ सन् १९९९ मा भारत पुग्नुभयो । त्यहीँबाट उहाँको आतिथ्य उद्योगको औपचारिक यात्रा प्रारम्भ भयो ।
भारतको प्रसिद्ध होटल सरवाना भवन समूहअन्तर्गत चेन्नई, नयाँ दिल्ली तथा भेल्लोरमा काम गर्दै उहाँले होटल व्यवसायको आधारभूत ज्ञान, ग्राहक सेवा, कार्य अनुशासन र सेवा संस्कृतिको वास्तविक महत्व बुझ्नुभयो । उहाँ भन्नुहुन्छ, "मेरो पहिलो होटल नै मेरो पहिलो विश्वविद्यालय थियो । "
अन्तर्राष्ट्रिय आतिथ्य उद्योगमा प्रवेश
सन् २००५ मा काशीराम अधिकारीको जीवनले नयाँ मोड लियो । उहाँ मलेसिया पुग्नुभयो र विश्वस्तरीय होटल उद्योगमा प्रवेश गर्नुभयो ।
सन् २००५ देखि २०१३ सम्म उहाँले मलेसियाका प्रतिष्ठित होटल तथा रिसोर्टहरूमा विभिन्न नेतृत्वदायी जिम्मेवारी सम्हाल्नुभयो । पङ्कोर लाउट रिसोर्ट, द रिज कार्लोटन, जेडब्ल्यू म्यारियटलगायतका संस्थाहरूमा कार्यरत रहँदा उहाँले लक्जरी आतिथ्य सेवा, अन्तर्राष्ट्रिय सेवा मापदण्ड, अतिथि अनुभव व्यवस्थापन, कर्मचारी नेतृत्व तथा सञ्चालनमा अनुभव हासिल गर्नुभयो ।
सिङ्गापुर, बाटाम र बालीको नेतृत्व यात्रा
सन् २०१३ डिसेम्बरमा उहाँ केवपी हस्पिटालिटी सिङ्गापुरमा आबद्ध हुनुभयो । यस समूहअन्तर्गत उहाँले इन्डोनेसियाका विश्वप्रसिद्ध लक्जरी रिसोर्टहरूमा नेतृत्वदायी भूमिका निर्वाह गर्नुभयो ।
बाटाम र बालीमा कार्यरत रहँदा उहाँले अन्तर्राष्ट्रिय पर्यटन बजार, लक्जरी रिसोर्ट सञ्चालन, अतिथि सन्तुष्टि, राजस्व व्यवस्थापन तथा बहुसांस्कृतिक टोली नेतृत्वका क्षेत्रमा उत्कृष्ट अनुभव हासिल गर्नुभयो ।
म्यानमारमा नेतृत्व
इन्डोनेसियापछि उहाँ म्यानमार पुग्नुभयो । त्यहाँ विनडम याङ्गुनद्वारा सञ्चालित टीआरवाईपीमा वरिष्ठ कर्मचारीको रुपमा नेतृत्वमा रहँदा होटल सञ्चालन, व्यवसाय विस्तार, सेवा गुणस्तर तथा मानव संसाधन विकासमा महत्वपूर्ण अनुभव लिँदै योगदान दिनुभयो ।
नेपाल फर्किएपछि नयाँ अध्याय
अन्तर्राष्ट्रिय अनुभवको लामो यात्रापछि काशिराम नेपाल फर्कनुभयो । उहाँको उद्देश्य स्पष्ट थियो—विश्वस्तरीय अनुभवलाई नेपालको आतिथ्य उद्योगको विकासमा प्रयोग गर्ने । नेपालमा उहाँको नेतृत्व यात्रा बुटवलको होटेल डा फ्लेमिङ्गोमा प्रि वपनिङ जनरल म्यानेजरबाट सुरु भयो ।
होटलको अवधारणा विकासदेखि उद्घाटनसम्मको सम्पूर्ण प्रक्रियामा उहाँले सफल नेतृत्व प्रदान गर्नुभयो । त्यसपछिका दिनमा उहाँले होटेल सिद्धार्थमा विभिन्न भूमिकामा रहेर सेवा गर्नुभयो भने बाँके कोहलपुरको होटल सेन्ट्रलप्लाजामा चिफ अपरेटिङ अफिसरको भूमिका सफलतापूर्वक निभाउनुभयो ।
लुम्बिनी ग्रीन होटल्स एण्ड रिसोर्ट्सको नेतृत्व
हाल काशीराम अधिकारी लुम्बिनी ग्रिन होटेल एण्ड रिसोर्टको ग्रुप सीईओको रुपमा रहनुभएको छ । उहाँको नेतृत्वमा समूहले सेवा उत्कृष्टता, प्रतिभा विकास, संस्थागत संस्कृति निर्माण, सञ्चालन सुधार, राजस्व वृद्धि, पर्यटन प्रवर्द्धन जस्ता क्षेत्रमा उल्लेखनीय उपलब्धि हासिल गरिरहेको छ।
आफ्नो लक्ष्य केवल होटल सञ्चालन गर्नु मात्र नभएर भविष्यका नेतृत्वकर्ताहरू तयार गर्नु पनि रहेको अधिकारीको भनाइ छ । उहाँका अनुसार संस्थाको सफलता भवन, उपकरण वा पूँजीले मात्र सम्भव हुँदैन; सही सोच, सही संस्कार र सही चरित्र भएका मानिसहरूले नै महान् संस्था निर्माण गर्छन् ।
प्रशिक्षक, मार्गदर्शक र प्रेरणास्रोत
होटल सञ्चालनका अतिरिक्त उहाँ नेतृत्व विकास, कर्मचारी प्रशिक्षण तथा युवा आतिथ्य व्यवसायिकहरूको मार्गदर्शनमा सक्रिय हुनुहुन्छ । उहाँले सयौं युवा व्यवस्थापक, सुपरभाइजर तथा होटल व्यवसायिकहरूलाई प्रशिक्षण, परामर्श र करियर मार्गदर्शन प्रदान गर्नुभएको छ ।
प्रकाशित मिति: सोमबार, साउन ११, २०८३
