हुम्ला। निकटको रेडियो, विकटको आवाज भन्ने ध्येयका साथ स्थापना भएको रेडियो कर्णाली आवाज आफ्नो १५ औँ वर्षमा प्रवेश गरेको छ।
वार्षिकोत्सवको अवसरमा रेडियोले पहिलो पटक जिल्ला बालसभाको आयोजना गर्दै बाल अधिकार र सामाजिक सुधारका विषयलाई प्राथमिकतामा राखेको छ।
एकीकृत सामुदायिक विकास तथा अनुसन्धान केन्द्रद्वारा २०६९ असार १ गतेदेखि प्रसारण सुरु गरेको रेडियो कर्णाली आवाजले यस वर्षको वार्षिकोत्सवलाई विशेष बनाउँदै हुम्लाका पाँचवटै गाउँपालिकाका बालबालिकाको सहभागितामा सिमकोटमा जिल्ला बालसभा सञ्चालन गरेको हो।
समाजमा कुरीतिका रूपमा रहेको बालविवाह र बालश्रम न्यूनीकरणमा साझा पहल” भन्ने मूल नारासहित आयोजित कार्यक्रममा ५० जना बालबालिका, विद्यालयका शिक्षक तथा विद्यालय व्यवस्थापन समितिका पदाधिकारीहरूको सहभागिता रहेको छ।
रेडियो कर्णाली आवाजका स्टेशन म्यानेजर नवराज महताराकाअनुसार बाल सभामार्फत बालविवाह र बालश्रम अन्त्यका लागि सामूहिक प्रतिबद्धता व्यक्त गरिनेछ। हिजोदेखि सुरु भएको कार्यक्रम आज बाल कचहरीसहित सम्पन्न हुने छ।
स्थानीय समुदायमा जनचेतना अभिवृद्धि गर्दै बाल अधिकार संरक्षणका विषयमा सशक्त आवाज उठाउने उद्देश्यले आयोजित यस कार्यक्रमले हुम्लामा बालमैत्री समाज निर्माणमा महत्वपूर्ण योगदान पुग्ने अपेक्षा गरिएको छ। रेडियो कर्णाली आवाजले विगत १४ वर्षदेखि कर्णालीका दुर्गम बस्तीका आवाजलाई सञ्चार माध्यममार्फत उजागर गर्दै आएको छ।
