चौतारा । सिन्धुपाल्चोकको चौतारा साँगाचोकगढी नगरपालिकाले आगामी आर्थिक वर्ष मानसिक स्वास्थ्य समस्याको उपचार र यसबाट बच्नका लागि सचेतनाको कार्यक्रम बढाउने भएको छ ।
नगरपालिकाका मेयर कृष्णप्रसाद सापकोटाले नगरबासीको मानसिक स्वास्थ्यका लागि आफूहरू गम्भीर रहेको उल्लेख गर्दै यो वर्ष आफूहरूले प्राप्त गरेको सुझाव, गुनासो र चासोका आधारमा आगामी दिनमा कार्यक्रम थप्ने प्रतिबद्धता जनाउनुभयो ।
मानसिक स्वास्थ्य समस्या भएका, सरोकारवाला निकाय र जनप्रतिनिधिका लागि नगरपालिका कार्यालयमा भएको अभिमुखीकरण कार्यक्रममा नगरप्रमुख सापकोटाले यस्तो बताउनुभयो ।
नगरपालिकाभरिमा करिब २ सय व्यक्ति मानसिक स्वास्थ्य समस्याका कारण औषधोपचारमा रहेको जानकारी गराउँदै उहाँले उनीहरूको उपचारमा सहयोग पुगोस् भन्नका लागि पालिकाकै बजेटबाट आवश्यक औषधि किनेर दिने गरिएको बताउनुभयो ।
कार्यक्रममा चौतारा साँगाचोकगढी नगरपालिकाका प्रमुख प्रशासकीय अधिकृत बैकुण्ठप्रसाद सापकोटाले सकारात्मक दृष्टिकोणको विकास होस् र मानसिक स्वास्थ्य समस्याका कारण हुने जोखिम टार्न सकियोस् भन्ने उद्धेश्यले अभिमुखीकरण कार्यक्रमलाई पालिकाले जोड दिएको बताउनुभयो ।
जन्मदै भएको कम्जोरीले मात्रै नभएर सामाजिक, आर्थिक, राजनीतिक कारणले पनि मानसिक स्वास्थ्य समस्या हुने उल्लेख गर्दै उहाँले सकारात्मक धारणा बनाएर पहुँचभन्दा बाहिरको परिस्थितिलाई स्वीकार गर्दै आफूसँग भएका सबल पक्षको विकासमा लाग्नु राम्रो हुने सुझाव दिनुभयो ।
नगरपालिकाले आगामी दिनमा नगरभित्रका स्वयंसेविकालाई पनि मानसिक स्वास्थ्य प्रबर्धनका लागि परिचालन गर्ने योजना बनाएको प्रमुख प्रशासकीय अधिकृत सापकोटाले बताउनुभयो ।
अभिमुखीकरण कार्यक्रममा चौतारा साँगाचोकगढी नगरपालिका वडा नम्बर ४, ५, ६, ७ र ८ का मानसिक स्वास्थ्य समस्या भएर औषधि लिइरहेका, उनीहरूका आफन्त, स्वास्थ्य स्वयंसेविका र जनप्रतिनिधि गरी ४६ जनाको सहभागिता रहेको थियो ।
प्रकाशित मिति: शनिबार, वैशाख २७, २०८२
