बाजुरा । पहिरोले घर पुरिँदा बाजुराको गौमुल गाउँपालिका ६ बसाला शान्ति टोलमा एकै परिवारका २ जनाको मृत्यु भएको छ ।
५ जना घाइते भएका छन् । गएराति साढे १२ बजेतिर आएको पहिरोले जंगे चदाराको घर पुरिँदा ३० वर्षकी निरुता चदारा र उहाँकी ६ वर्षकी छोरी किस्मीता चदाराको मृत्यु भएको प्रहरी नायव उपरिक्षक उद्धव सिंह भाटले जानकारी दिनुभयो ।
९० वर्षका जंगे चदारा गम्भीर घाइते हुनुभएको छ । उहाँको जिल्ला अस्पताल बाजुरामा उपचार भइरहेको र खतरामुक्त रहेको प्रहरीले जनाएको छ । सुके चदारा, जडेनी चदारा, अस्मीता चदारा र विकास चदारा पनि घाइते हुनुभएको छ ।
पहिरो घरको पछाडि पट्टीको भागबाट खसेको हो । लगातारको अत्यधिक वर्षाका कारण पहिरो गएको अनुमान गरिएको छ । पहिरोका कारण भएको क्षति विवरण बारे जानकारी लिन प्रहरी नायव उपरिक्षक उद्धव सिंह भाट नेतृत्वको टोली घटनास्थल पुगेको छ ।
राति १ बजे नै गौमुल इलाका प्रहरी कार्यालयबाट टोली खटी गएको थियो । भिरालो जमिनमा रहेको बस्ती भएकोले अन्य परिवार पनि पहिरो जाने त्रासमा छन् ।
भूगर्वविद्हरुले सशालाको सिङ्गो बस्ती पहिरोको उच्च जोखिममा रहेकाले सार्न सुझाव यस अघि नै दिईसकेको थियो ।
पहिरोमा परी मृत्युभएका दुवैको जिल्ला अस्पतालका डा टीकाराम राई नेतृत्वको टोलीले गौमुल गाउँपालिकाको स्वास्थ्य शाखामा पोष्टमार्टम गरिरहेको छ । पोष्टमार्टपछि शव आफन्तको जिम्मा लगाउने तयारी भएको छ ।
प्रकाशित मिति: शुक्रबार, साउन १७, २०७६, १४:३०
