काठमाडौँ । नेपालसँगको टी–ट्वान्टी क्रिकेट शृंखला वेस्ट इन्डिज ‘ए’ले जितेको छ । पहिलो खेल हारे पनि त्यसपछिका तीन खेलमा लगातार जित हात पार्दै वेस्ट इन्डिज ‘ए’ले शृंखला जितेको हो ।
विहीबारको खेलमा वेस्ट इन्डिज ‘ए’ले नेपाललाई २८ रनले हराएको हो । २१० रनको लक्ष्य पाएको नेपालले २० ओभरमा १८१ रन मात्र बनाउन सक्यो । नेपालका कप्तान रोहित पौडेलले ८२ रन बनाउनुभयो ।
अविनाश बोहोरा १७ रनमा नटआउट रहेको खेलमा सन्दीप जोरा, दीपेन्द्रसिंह ऐरी र गुल्सन झाले समान १९ रन बनाउनुभयो ।
पहिले ब्याटिङ गरेको वेस्ट इन्डिज ‘ए’ले २० ओभरमा ३ विकेट गुमाएर २०९ रन बनाएको थियो । वेस्ट इन्डिजका आन्द्रे फ्लेचरले अविजित ८४, जोन्सन चार्ल्सले ५४ र फाबियन एलिनले आक्रामक रूपमा अविजित ३३ रन बनाउनुभयो । नेपालका कुशल भुर्तेलले २ र प्रतिस जीसीले १ विकेट लिनुबाहेक अरु खेलाडीले विकेट लिन सकेनन् ।
प्रकाशित मिति: बिहीबार, वैशाख २०, २०८१, १५:५९
