काठमाडौँ । नेपालमा चालु आर्थिक वर्षको सुरुका छ महिना (साउनदेखि पुस मसान्तसम्म) मा ६८८ मेट्रिक टन बेसार आयात भएको छ । बेसारको आयात ३ वर्षको तुलनामा केही घटे पनि अझै ठुलो परिमाणमा बेसार आयात भइरहेको हो । विभागका अनुसार यो बेसारको मूल्य १४ करोड ३१ लाख ८९ हजार रुपैयाँ रहेको छ ।
तीन वर्ष अघि यो अवधिमा १ हजार ५ सय ९८ मेट्रिक टन बेसार आयात गरिएको भन्सार विभागले जनाएको छ । ३ वर्ष अघि यही अवधिमा भने १ हजार ५ सय ९८ मेट्रिक टन बेसार आयात गरिएको थियो । त्यसबेला कोरोना भाइरस सङ्क्रमणको डरले बेसार प्रयोग बढेसँगै नेपालमा बेसार आयात बढेको विभागले जनाएकाे थियो ।
आयात केही घटेको देखिए पनि नेपालमा वार्षिक खपतको आधाभन्दा धेरै बेसार आयात हुने गरेको छ । नेपालमा बेसार खेतीको पर्याप्त सम्भावना रहे पनि ठुलाे परिमाणमा आयात भइरहेको हो । विभागका अनुसार नेपालमा वार्षिक खपतको झण्डै आधा बेसार आयात हुने गरेको छ ।
नेपालमा मुख्यतया भारत र केही इथियोपियाबाट समेत बेसार आयात हुने गरेको भन्सार विभागले जनाएको छ । नेपालको धेरै ठाउँमा सहजै खेती गर्न सकिने र तुलनात्मक रूपमा खेती गर्न सजिलो भए पनि बेसार खेतीको विस्तार भने हुन सकेको छैन । पछिल्लो समय बाँदरले अन्य बाली खाएर हैरान पारिरहेका बेला बेसार खेती उपयुक्त विकल्प हुन सक्ने कृषिविद्ले सुझाव दिएका छन् । बेसार बाँदरले नखाने भएकाले किसानलाई फाइदा पुग्ने उनीहरूको भनाइ छ ।
प्रकाशित मिति: बिहीबार, माघ ११, २०८०, १५:०१
