४४ लाख मात्रा कोरोना खोप ३ दिनपछि आउँदै

स्वास्थ्य

४४ लाख मात्रा कोरोना खोप ३ दिनपछि आउँदै एकै मात्रा लगाए पुग्ने जानसिन खोप सकियो, हतारमा वैदेशिक रोजगरीको यात्रा तय नगर्न स्वास्थय मन्त्रालयको अनुरोध

सीआईएन मंगलबार, भदौ २९, २०७८

फाइल तस्विर।

काठमाडौँ । सबै नेपालीलाई कोरोनाविरुद्धको खोप लगाउने रणनीति अनुसार सकारले यही हप्ताभित्र चीनबाट ४४ लाख मात्रा भेरोसेल खोप ल्याउने सम्झौता गरेको छ ।

स्वास्थ्य तथा जनसङ्ख्या मन्त्रालयका अनुसार असोज मसान्तसम्ममा कुन जनसङ्ख्याको एक तिहाइ, पुस मसान्तसम्म दुई तिहाइ र चैत मसान्तसम्ममा सबै नेपालीलाई कोरोनाविरुद्धको खोप लगाइसक्ने योजना सरकारले बनाएको छ ।

त्यसैअनुसार ४४ लाख मात्रा खोप ल्याउन नेपाल वायु सेवा निगमको जहाज बेइजिङ जादैछ । आउँदो शुक्रबारसम्म सम्झौता अनुसारको सबै खोप नेपाल ल्याइसक्ने परिवार कल्याण महाशाखा अन्तर्गतको खोप शाखा प्रमुख डा सागर दाहालले सीआईएनसँगको कुराकानीमा बताउनुभयो ।

महाशाखाले वैदेशिक रोजगारीमा जानेहरूलाई एकै मात्रा लगाए पुग्ने जानसिन खोप भने सकिएको बताएको छ । खोपको बारेमा जानकारी लिएर मात्रै वैदेशिक रोजगारीको प्रक्रिया सुरु गर्न पनि प्रमुख दाहालले अनुरोध गर्नुभयो ।

१८ वर्षमुनिका बालबालिकालाई दिन ४० लाख मात्रा मोडर्ना खोप ल्याउने टुङ्गो लागिसकेको पनि स्वास्थ्य मन्त्रालयको भनाइ छ । ६० लाख माा फाइजरको खोप ल्याउने प्रक्रिया पनि मन्त्रालयले अघि बढाइसकेको जनाएको छ ।

सीआईएनसँग कुराकानी गर्दै सङ्क्रामक रोग विशेषज्ञ डा विराज कर्माचार्यले कोरोनाबाट जोगिनका लागि खोप नै सबैभन्दा उत्तम विकल्प भएको बताउनुभयो ।

नेपालमा कोरोनाविरुद्धको पूरा मात्रा खोप लगाउनेको सङ्ख्या १७.४१ प्रतिशत पुगेको छ भने पहिलो मात्रा खोप लगाउनेको सङ्ख्या १९.४५ प्रतिशत रहेको स्वास्थ्य मन्त्रालयको विवरणमा उल्लेख छ ।

मन्त्रालयका अनुसार पछिल्लो समय कोरोना सङ्क्रमण पुष्टि हुने दरमा कमी आएसँगै सक्रिय सङ्क्रमितको सङ्ख्या घट्न थालेको छ । हाल देशभर सक्रिय सङ्क्रमितको सङ्ख्या २४ हजार ९ सय ५८ रहेको छ । एक साता अघि नेपालमा सक्रिय सङ्क्रमितको सङ्ख्या ३१ हजार ९ सय ७३ रहेको थियो ।

प्रकाशित मिति: मंगलबार, भदौ २९, २०७८

सीआईएन मंगलबार, भदौ २९, २०७८