अभाव भएको स्थानमा पीसीआर किट पठाईँदै

स्वास्थ्य

अभाव भएको स्थानमा पीसीआर किट पठाईँदै रोकिएको प्रयोगशालामा पीसीआर परीक्षण सुचारु हुने स्वास्थ्य मन्त्रालयको भनाइ, किट अभाव नभएको दावी

सीआईएन शुक्रबार, वैशाख २६, २०७७

त्रिभुवन अन्तरराष्ट्रिय विमानस्थलमा स्वीटजरल्यान्ड सरकारले दिएको किट ग्रहण गर्दै स्वास्थ्य मन्त्री भानुभक्त ढकाल ।

काठमाडौँ । नेपालमा पीसीआर विधिबाट गरिने कोरोना परीक्षणका लागि आवश्यक किट आजबाट सम्बन्धित अस्पतालमा पठाइने भएको छ ।

स्वीटजरल्याण्ड सरकार विकास सहयोगमा ३० हजार थान किट हिजो साँझ नेपाल आइपुगेपछि आजबाट अभाव भएका प्रदेशका अस्पतालमा पठाइने छ ।

स्वास्थ्य मन्त्रालयका प्रवक्ता डा.विकास देवकोटाले केही दिनदेखि नेपालका विभिन्न स्थानमा रहेको प्रयोगशालामा रोकिएको पीसीआर परीक्षण सुचारु हुने सीआइएनसँग बताउनुभयो ।

हाललाई किट पर्याप्त भएको दावी गर्दै प्रवक्ता देवकोटाले आगामी महिनामा कति परीक्षण गर्ने त्यसपछि कसरी जाने भन्ने विषयमा रणनीति बनाएर जाने तयारी भइरहेको जानकारी दिनुभयो ।

देशभर कोरोना सङ्क्रमितको सङ्ख्या बढ्दै जाँदा परीक्षण भने घटेको छ । आरएनए एक्स्ट्राक्सन किट अभावमा पीपीआर परीक्षण घटेको मात्र छैन, विभिन्न स्थानका प्रयोगशाला ठप्प भएका छन् ।

काठमाडौँको वीर अस्पताल, चितवनको भरतपुर अस्पताल, धुलिखेल अस्पताल तथा हेटौँडा र धनगढी लगायतका प्रयोगशालामा आरएनए किट सकिएका छन् ।

सरकारले धनगढी र हेटौँडाका लागि सम्बन्धित प्रदेशको सामाजिक विकास मन्त्रालयमार्फत किट पठाएको थियो । उनीहरूले पटक–पटक संघीय सरकारसँग किट माग गरेका छन, तर पाउन सकेका छैनन ।

प्रकाशित मिति: शुक्रबार, वैशाख २६, २०७७

सीआईएन शुक्रबार, वैशाख २६, २०७७