अछाम ।
कैलालीको गौरीफन्टा नाकाबाट अछाम आइपुगेका ५० जनालाई मंगलसेनमा स्थापना गरिएको क्वारेन्टाइनमा राखिएको छ ।
नगरपालिकाको कृषि ज्ञान केन्द्रको भवनमा क्वारेन्टाइन स्थापना गरि अछामका ८ स्थानीय तहका १२ जना बालबालिका, २८ पुरुष र १० जना महिला गरि ५० जनालाई चेकजाँच सहित सुरक्षित तरिकाले क्वारेन्टाइनमा राखिएको मंगलसेन नगरपालिकाले जनाएको छ ।
जसमा मंगलसेन नगरपालिकाका ११, चौरपाटी गाउँपालिकाका १०, कमलबजार नगरपालिकाका ८, ढकारी गाउँपालिकाका ८, मेल्लेख गाउँपालिकाका ७, साँफेबगर नगरपालिकाका ३, रामारोशन गाउँपालिकाका २ र पञ्चदेवल विनायक नगरपालिकाका १ जना रहेका मंगलसेन नगरपालिकाका प्रमुुख पदमबहादुर बोहराले जानकारी दिनुभयो ।
यसैबिच, मंगलसेनको क्वारेन्टाइनमा राखिएका सबैको स्वास्थ्य अवस्था सामान्य रहेको चिकित्सकहरूले बताएका छन् ।
५० जनाकै चेकजाँच गर्दा कोरोनाभाइरसको कुनै लक्षण नदेखिएकाले सुरक्षित क्वारेन्टाइनमा राखिएको जिल्ला अस्पतालका डाक्टर अतुुल भारद्धाजले बताउनुभयो ।
१४ दिनसम्म क्वारेन्टाइनमा राख्नुपर्ने भएकाले सो अवधिमा कुनै लक्षण देखिए तुरुन्तै जिल्ला अस्पतालको आईशोलेसन वार्डमा राखेर उपचार गरिने उहाँले बताउनुभयो ।
प्रकाशित मिति: बुधबार, चैत १२, २०७६, १८:३३
