स्वास्थ्य शिविर पर्खँदै काभ्रेको'घुँडा दुख्ने'गाउँ

समाज

स्वास्थ्य शिविर पर्खँदै काभ्रेको'घुँडा दुख्ने'गाउँदुखाइ कम गर्ने ओषधिको भरमा मेलापात गर्नुपर्ने बाध्यता, भोट हालेर जिताएकाहरुले बिर्सिएको गुनासो (अडियोसहित)

शोभा हुमागाईँ सोमबार, मंसिर १३, २०७८, ०८:००

काभ्रे । काभ्रेको तेमाल गाउँपालिका वडा नम्बर ६ ठूलो पर्सेल, यहाँ पुग्नका लागि बाटो त छ तर ठाउँठाउँमा भेटिने खाडल, उकालीओरोली, कच्ची सडकका कारण तीव्र गतिमा गन्तव्यमा पुग्न जोकोहीलाई मुस्किल हुन्छ ।

वडा कार्यालयका अनुसार ठूलो पर्सेलको जनसङ्ख्या ४५ सय ७७ छ । वारि डाँडा र पारि डाँडामा विभाजित बिभिन्न गाउँमध्ये ‘कामी गाउँ’ मा करिब ३५ घरधुरीका नागरिक बस्छन् ।

यो बस्तीका अधिकांश महिला घुँडा दुख्ने समस्या पाल्न बाध्य छन् । स्थानीय एक महिला पन्चमाया बिकले पृथ्वीका कुनै पनि मानिसलाई नभएको समस्या आफूलाई आइलागेको बताउनुभयो ।

‘घुँडा दुख्ने समस्या मलाई छ । घरमा १८ वर्षको छोरी छ । मानसिक रुपमा पनि बिरामी भएको छोरीलाई पायल्स तथा पिसाब चुहिने समस्या वर्षौँदेखि छ । उपचारका लागि सकैलाई भन्न पनि सकेको छैन । मेरो दुख कसैले बुझ्दैन ।’ पन्चमायाले भन्नुभयो ।

बायाँबाट क्रमशः स्थानीयबासी पन्चमाया विक र वडा नम्बर ६ का सदस्यासमेत रहनुभएका नक्कली विक।

दलित समुदायका नागरिकको बाहुल्यता रहेको ‘कामी गाउँ’ लाई आर्थिक, शैक्षिक लगायतका पूर्वाधारले राम्रोसँग छुन सकेको छैन ।

स्वाथ्यमा पटकपटक आइरहने समस्याका कारण जसोतसो दुख काट्नुपरेको अर्का स्थानीयबासी विष्णुमाया विक बताउनुहुन्छ ।

तीन वर्षदेखि घुँडा दुख्ने समस्या भएको सुनाउँदै एक्सरे गर्दा घुँडाको हड्डी खिइएको भनेर ६/७ हजार रुपैयाँको औषधि दिइएको तर निको नभएको विष्णुमायाको भनाइ छ ।

४ वर्षअघि मुलुकभरमा जस्तै यहाँका बासिन्दाले पनि भोट हालेर जनप्रतिनिधि चुने तर उनीहरूले पनि आफ्ना समस्या नबुझेको यहाँका नागरिक गुनासो गर्छन् ।

ठूलो पर्सेलका विष्णुमाया विक ।

आफ्नो श्रीमतीलाई पनि घुँडा दुख्ने समस्या भएको तर उपचारका लागि धेरै ठाउँमा गए पनि के भएको भन्ने बारेमा जानकारी पाउन नसकेको स्थानीय यादव पाण्डेले बताउनुभयो ।

काभ्रेको सदरमुकाम धुलीखेलबाट करिब ३९ किलोमिटरको दुरीमा रहेको ठूलो पर्सेलमा गाउँघरमा प्रायः वृद्धवृद्धाहरू मात्रै भेटिन्छन् ।

गाउँमै स्वास्थ्य शिविर चलाएर जाँच गरिदिनुपर्ने उनीहरूको माग छ ।

यो माग पूरा गर्न वडाले सक्ला ? जवाफमा वडाअध्यक्ष विकुलाल तामाङले भन्नुभयो, ‘आर्थिक वर्ष २०७८/७९ गोडा, घुँडा दुख्ने लगायतका बिभिन्न स्वास्थ्य समस्यालाई लक्षित गर्दै शिविर सञ्चालन गर्ने योजना छ । हामी चाँडै शिविर सञ्चालनको तयारीमा छौँ ।’