विरगञ्ज महानगर मेयर सरावगीलाई कोरोना !

समाज

विरगञ्ज महानगर मेयर सरावगीलाई कोरोना ! अस्पतालबाटै भने, 'कोरानालाई जितेर म फेरि तपाईँको सेवामा हाजिर हुनेछु, तपाईँ पनि सावधानी अपनाउनूहोला ।'

सीआईएन शुक्रबार, साउन १६, २०७७

वीरगञ्ज महानगरपालिकाका मेयर विजय सरावगी ।

काठमाडौँ । कोरोना भाइरसको सङ्क्रमण पुष्टि भएपछि वीरगञ्ज महानगरपालिकाका मेयर विजयकुमार सरावगीले आफ्नो स्वास्थ्य अवस्था सामान्य रहेको जानकारी दिँदै कोरोनालाई जितेर चाँडै नागरिकको सेवामा हाजिर हुने बताउनुभएको छ ।

सरावगीलाई हिजो कोरोना भाइरस (कोभिड–१९) को सङ्क्रमण पुष्टि भएको थियो । स्वास्थ्य परीक्षणका लागि काठमाडौं आएका सरावगीको स्वाब सङ्कलन गरेर परीक्षण गरिएको थियो ।

परीक्षण रिपोर्ट पोजेटिभ आएको फेसवुकमार्जाफत जानकारी दिँदै वीरगञ्जमा कोरोना समुदायस्तरमा फैलिएको हुनसक्ने शङ्का गर्नुका साथै सावधानी अपनाउनका लागि पनि नगरवासीसँग अनुरोध गर्नुभएको छ ।

मेयर सरावगी भारतबाट आएकाहरुको क्वारेन्टिन, संक्रमितहरुको आइसोलेसनमा खटिँदै आउनुभएको थियो ।

मेयर सरावगीको फेसवुक स्टाटस्ः

आदरणीय दाजु, भाइ तथा दिदीबहिनीहरु,

विगत पाँच महिनादेखि कोरोना भाइरसको संक्रमणबाट वीरगंजवासीलाई वचाउन मैले हर संभव प्रयासहरु गरेँ ।

संघीय र प्रदेश सरकारको दायित्व अन्तर्गत रहेको क्वारेन्टिन, आइसोलेशन सेन्टर, कोभिड अस्पतालको व्यवस्थापन र संचालनको जिम्मेवारी ती निकायहरुले नलिएपछि मैले नै लिएर नागरिकको जीवन रक्षाको लागि अथक प्रयत्न गरेँ ।

वीरगंजलाई वचाउन पिसिआर मेशिन, परिक्षणका लागि आवश्यक पर्ने किटहरुको समेत व्यवस्थापन गरेँ । क्वारेन्टिन, आइसोलेशन र कोभिड अस्पतालमा रहेका संक्रमितहरु सहित अस्पतालमा कार्यरत डाक्टर, स्वास्थ्यकर्मी र सफाईकर्मीको खाना र वस्नेको व्यवस्था मिलाएँ ।

वीरगंजलाई ग्रिन जोन वनाउने उद्देश्यका साथ एकघर एक परीक्षणको अभियान संचालन गर्ने भनिएता पनि त्यसको कार्यान्वयन समयमा हुन नसक्दा वीरगंजमा कोरोना संक्रमण समुदाय स्तरमा फैलिसकेको रहेछ ।

तपाईहरुको सेवामा अनवरत रुपमा लाग्दालाग्दै म स्वंयम कोरोनाको संक्रमणको चपेटामा परेको छु । म अहिले उपचारार्थ छु, मेराे स्वास्थ्य अवस्था सामान्य छ । मैले छिट्टै नै काेराेनालाई जित्ने छु ।

पछिल्लो पटक कोरोना संक्रमणबाट वीरगंज आक्रान्त वनेको छ, वीरगंजलाई वचाउन अग्रमोर्चामा रहनु हुने स्वास्थ्कर्मी, महानगरपालिकाका जनप्रतिनिधी, कर्मचारी, नागरिक समाज, संचारकर्मी, विभिन्न राजनीतिक दल, स्थानीय प्रशासन र सुरक्षाकर्मीको प्रयासलाई धन्यवाद दिन चाहन्छु ।

अव स्थानीय स्तरबाट मात्र कोरोना नियन्त्रण गर्ने अवस्था देखिदैन तसर्थ वीरगंजवासी दाजुभाई दिदी वहिनीको जिवन रक्षाको लागि संघीय र प्रदेश सरकारले तत्काल ठोस योजनाका साथ अधि बढन आग्रह गर्दछु ।

साथै कोरोना संक्रमणको यो घडिमा आफूलाई संयमित राख्न र नेपाल सरकारले तोकेको मापदण्ड पालना गर्न सम्पूर्ण महानगरवासी दाजु भाई दिदी वहिनीमा अपिल गर्दछु कोभिड १९ का विरुद्ध महानगरपालिकाले लिएका नीति प्रति साथ सहयोग दिनुहुने सम्पूर्ण महानुभाव प्रति हार्दिक नमन । मैले कोरोना संक्रमणको लडाई जितेर पुन तपाईको सेवामा आउने प्रतिवद्धता जाहेर गर्दछु ।

प्रकाशित मिति: शुक्रबार, साउन १६, २०७७

सीआईएन शुक्रबार, साउन १६, २०७७