तेह्रथुम । ‘कोशीको गौरव हिमालको ज्ञान, पर्यटन वर्षमा सबैलाई सम्मान’ भन्ने मूल नाराका साथ होमस्टे तथा होटल सञ्चालकहरूका लागि सञ्चालन गरिएको अभिमुखीकरण तथा तालिम कार्यक्रम तेह्रथुममा सम्पन्न भएको छ ।
पर्यटन, वन तथा वातावरण मन्त्रालय, कोशी प्रदेश विराटनगरको आयोजनामा तथा लालीगुराँस नगरपालिकाको सहजिकरणमा जेठ १७ गतेदेखि २० गतेसम्म तेह्रथुमको लालीगुराँस नगरपालिका–बसन्तपुरमा तालिम सञ्चालन गरिएको थियो ।
तालिममा २४ जना होमस्टे तथा होटल सञ्चालकहरूको सहभागिता रहेको थियो ।
पर्यटन व्यवसायलाई थप व्यवस्थित, गुणस्तरीय र पर्यटकमैत्री बनाउने उद्देश्यले सञ्चालन गरिएको तालिममा आतिथ्य सत्कार, सेवा व्यवस्थापन, पर्यटकीय सम्भावना, स्थानीय संस्कृति तथा पर्यटन प्रवद्र्धनका विषयमा प्रशिक्षण प्रदान गरिएको आयोजकले जनाएको छ ।
कोशी प्रदेश सरकारले घोषणा गरेको पर्यटन वर्षलाई सफल बनाउन स्थानीय तह, पर्यटन व्यवसायी तथा समुदायबीचको सहकार्य आवश्यक रहेको तालिम समापन कार्यक्रममा बोल्नेहरूले बताए ।
उनीहरूले वसन्तपुर क्षेत्रको प्राकृतिक सौन्दर्य, हिमाली दृश्यावलोकन तथा सांस्कृतिक विविधतालाई पर्यटनको मुख्य आधार बनाएर अगाडि बढ्नुपर्नेमा जोड दिएका थिए ।
तालिमले स्थानीय होमस्टे तथा होटल सञ्चालकहरूको क्षमता अभिवृद्धि गर्दै पर्यटन क्षेत्रको गुणस्तरीय विकासमा महत्वपूर्ण योगदान पुग्ने अपेक्षा गरिएको छ ।
प्रकाशित मिति: बिहीबार, जेठ २१, २०८३
