तेह्रथुम । तेह्रथुम–संखुवासभा–ताप्लेजुङ जोड्ने प्रसिद्ध तिनजुरे मिल्के जलजले (टिएमजे) क्षेत्रमा आज शनिबार आन्तरिक तथा बाह्य पर्यटकको उल्लेख्य घुइँचो देखिएको छ।
गुराँस फुल्ने मौसमसँगै बसन्तपुर चोत्लुङ पार्कदेखि टुटे देउराली, आरआर गार्डेन, डुँडपानी, घुर्बिसे, पाथिभरा आसपास, पाँचपोखरी तथा गुफा क्षेत्रसम्म पर्यटकहरूको बाक्लो उपस्थिति देखिएको हो । पर्यटकको चाप बढेसँगै स्थानीय होटल तथा लजहरू भरिभराउ भएका छन् भने पदमार्गहरूमा समेत चहलपहल उल्लेख्य रूपमा बढेको छ। करिब १७ सय मिटरदेखि ५,हजार मिटर उचाइसम्म फैलिएको (टिएमजे) क्षेत्रले प्राकृतिक सौन्दर्य र जैविक विविधताको महत्वपूर्ण केन्द्रको रूपमा पहिचान बनाएको छ ।
विश्वमै दुर्लभ मानिने गुराँसका ३२ प्रजातिमध्ये २८ प्रजाति यही क्षेत्रमा पाइने भएकाले (टिएमजे) अहिले गुराँस अवलोकनका लागि प्रमुख गन्तव्यको रूपमा स्थापित भएको छ । चैतदेखि जेठसम्म जंगललाई रंगीन बनाउने गुराँस हेर्न नेपालका विभिन्न जिल्लाबाट मात्र नभई भारतका सिलिगुडी, दार्जिलिङ र सिक्किमबाट समेत हजारौं पर्यटक यहाँ पुग्ने गरेका छन् । तर पछिल्लो समय केही पर्यटक तथा स्थानीयबाट जथाभावी गुराँसका फुल टिप्ने र हाँगा भाँच्ने गतिविधि बढ्दै गएको पाइएको छ। यसप्रति गम्भीर ध्यानाकर्षण गराउँदै चैते सामुदायिक वन उपभोक्ता समिति का अध्यक्ष इन्द्रबहादुर खड्का ले यस्ता कार्यमा संलग्न व्यक्तिलाई वन ऐनअनुसार कडा कारबाही गरिने चेतावनी दिनुभएको छ ।
समितिले गुराँस संरक्षणलाई प्राथमिकतामा राख्दै सचेतनामूलक अभियान सञ्चालन गरिरहेको जनाएको छ । स्थानीयवासीले पनि पर्यटकलाई फुल नटिप्न, हाँगा नभाँच्न र प्राकृतिक सम्पदा जोगाउन आग्रह गरिरहेका छन् । प्राकृतिक सौन्दर्यको अनुपम धरोहर मानिएको (टिएमजे) क्षेत्रको संरक्षण सबैको साझा दायित्व भएको सरोकारवालाहरूले बताएका छन् ।
प्रकाशित मिति: आइतबार, वैशाख १३, २०८३
