बैतडी । बैतडीमा भाेलि हुने प्रतिनिधि सभा सस्दस्य निर्वाचनको तयारी पूरा भएको छ ।
जिल्ला निर्वाचन अधिकारी खगेन्द्र भारतीका अनुसार यहाँका २१५ ओटै मतदान केन्द्रमा बिहीबार बिहान ७ गतेदेखी हुने मतदानका सबै तयारी तयारी पूरा भएको हो। यसअघि नै मतपत्रलगायत आवश्यक सामग्रीसहित निर्वाचनमा खटिएका कर्मचारीहरु सम्बन्धीत मतदान केन्द्रमा पुगीसकेका थिए ।
मतदानस्थल निर्माणसंगै आवश्यक सम्पूर्ण तयारी पूरा भएकाले भोलीहुने आम निर्वाचनमा ढुक्क भएर मतदानमा सहभागी भइ मताधिकारको प्रयोग गर्न निर्वाचन अधिकारी भारतीले आग्रह गर्नुभयो । मतदान केन्द्रमा कर्मचारीहरुले सूचना टाँस गर्ने, मुचुल्का उठाउने, सर्वदलीय बैठक आयोजना गर्ने र मतदान केन्द्र व्यवस्थापनको काम भैसकेको उहाँले बताउनुभयो ।
प्रतिनिधि सभाका लागि एक निर्वाचन क्षेत्र रहेको बैतडीमा ११ जना चुनावी मैदानमा रहेका छन् । यहाँ १ लाख ५६ हजार ३७२ मतदाता रहेका छन् । यस्तै निर्वाचनलाई स्वच्छ, निष्पक्ष र भयरहित वातावरणमा सम्पन्न गर्नका लागि जिल्लाभरी २ हजार ७ सय सुरक्षाकर्मी परिचालन गरिएका प्रमुख जिल्ला अधिकारी कृष्ण थापाले जानकारी दिनुभयो ।
जिल्लाका १० ओटै स्थानीय तहमा नेपाली सेनाले बेस क्याम्प सञ्चालनमा ल्याएको छ भने नेपाल प्रहरी, सशस्त्र प्रहरी र निर्वाचन प्रहरी आवश्यकता अनुसार खटाइएको प्रमुख जिल्ला अधिकारी थापाले बताउनुभयो ।
जिल्लामा निर्वाचनका लागि १ हजार २८८ जना कर्मचारी खटिएका छन्।प्रतिनिधि सभा सदस्य निर्वाचनका लागि एक निर्वाचन क्षेत्र रहेको बैतडीमा १२९ मतदानस्थल, एक अस्थायीसहित २१५ मतदान केन्द्र रहेका छन् ।
प्रकाशित मिति: बुधबार, फागुन २०, २०८२
