काठमाडौँ । आर्थिक स्रोत जुटाउनका लागि हिजोआज सरकारी विद्यालयहरूलाई हम्मेहम्मे पर्छ । यसै आवश्यकतालाई ध्यान दिएर लुम्बिनी प्रदेश सरकारले "मेरो विद्यालय मेरो दायित्व" अभियान सुरु गरेको छ ।
यो अभियान अन्तर्गत आफूले पढेको विद्यालयको विकास र सुविधाका लागि पूर्व विद्यार्थीले आर्थिक तथा नैतिक सहयोग गर्नुपर्ने व्यवस्था छ ।
सल्यान जिल्लामा रहेको कालिका माध्यमिक विद्यालयले भने यस्तो अभ्यास पहिले नै गरिसकेको छ । पूर्वविद्यार्थी, सामुदायिक वन, आमा समूहलगायतबाट २ महिनामा २९ लाखभन्दा धेरै सहयोग सङ्कलन गरेको विद्यालयको भनाइ छ ।
कोटमैलामा रहेको यो विद्यालयले विद्यार्थी हितकोषका लागि सुरु गरेको अभियानबाट २९ लाखभन्दा धेरै आर्थिक सहयोग सङ्कलन गरेको प्रधानाध्यापक खुमराज केसीले सीआईएनसँग बताउनुभयो ।
उहाँका अनुसार ७ सयभन्दा धेरै व्यक्तिले यो अभियानमा साथ दिएका छन् । प्रधानाध्यापक केसीले कोषको रकम १ करोड पुर्याउने लक्ष राखिएको छ ।
कार्यविधि बनाएर उक्त कोषबाट प्राप्त हुने ब्याजबाट शिक्षक व्यवस्थापन, भौतिक सामग्री खरिद तथा निर्माणको काम गरिने विद्यालयले जनाएको छ ।
कोषमा सर्वाधिक आर्थिक सहयोग गर्नेहरूलाई विद्यालयले ५० औँ वार्षिकोत्सव तथा स्वर्णजयन्तीको अवसर पारेर सम्मान गरेको छ ।
प्रकाशित मिति: बिहीबार, फागुन १५, २०८१
