काठमाडाैँ । चितवनको गोला घाटको नारायणी नदी किनारमा भेटिएका २ मध्ये एउटा शवको सनाखत भएको छ । आज भेटिएका दुई वटा मध्येको एउटा शव सर्लाहीको बरहथवा नगरपालिका ३ का १९ वर्षका रमित कुशर माझीको रहेको जिल्ला प्रहरी कार्यालय चितवनका प्रहरी नायव उपरीक्षक भेषराज रिजालले सीआईएनलाई जानकारी दिनुभयो ।
उहाँ काठमाडौँबाट गौरका लागि छुटेको गणपती यातायातको प्रदेश नम्बर ०३–००१ ख २४९५ नम्बरको बसका यात्रु रहेको भनी उहाँका बुबा रवीन्द्र कुशर माझीले सनाखत गर्नुभएको पनि डिएसपी रिजालले बताउनुभयो । अर्को शवको भने सनाखत हुन बाँकी छ ।
यसअघि भेटिएको शव भारत बिहारका ऋषिपाल साहको भएको पुष्टि भएको थियोे । अर्को बस पनि दुर्घटनामा परेका बसका यात्रुको भएको हनसक्ने आशङ्का गरिए पनि पुष्टि हुन बाँकी रहेको उहाँले बताउनुभयो । बसको खोजीलाई थप प्रभावकारी बनाउन आजबाट ठुलो चुम्बक र पानी मुनि पनि गएर खोज्न सक्ने ड्रोन सहितको क्यामेरा लगायत उपकरण प्रयोग गरिएको पनि डीएसपी रिजालले जानकारी दिनुभयो ।
आज साँझ परेसँगै खोजी कार्य स्थगित गरी भोली बिहानबाट पुन खोजी थालिने उहाँले जानकारी दिनुभयो । वीरगन्जबाट काठमाडौँका लागि छुटेको र काठमाडौँबाट रौतहटको गौरका लागि छुटेको बसलाई हिजो बिहान ३ बजेतिर लेदोसहितको पहिरोले बगाएको थियो । दुवै बसमा गरी ६२ जना यात्रु रहेको प्रहरीले जनाएको छ ।
प्रकाशित मिति: शनिबार, असार २९, २०८१
