काठमाडौँ । बैशाख १५ गते इलाम–२ र बझाङ १ (१) मा हुने उप निर्वाचनमा एकीकृत माओवादी केन्द्र र नेकपा एकीकृत समाजवादीले उम्मेदवार उठाउने भएका छन् । सत्ता गठबन्धनमा रहेका दलहरुबिच साझा उम्मेदवार बनाउने विषयमा छलफल भइरहे पनि माओवादी केन्द्र र नेकपा एसले आ आफ्ना उम्मेदवार उठाउने निर्णय गरेका हुन् । एमालेले यसअघि नै दुबै ठाउँमा उम्मेदवार घोषणा गरिसकेको छ ।
बुधबार बालुवाटारमा बसेको माओवादी केन्द्रको पदाधिकारी बैठकले दुवै क्षेत्रमा पार्टीका तर्फबाट उम्मेदवारी दिने निर्णय भएको उपमहासचिव वर्षमान पुनले बताउनुभयो ।
यो पार्टीहरूको जनमत परीक्षणको विषय पनि भएकाले आ आफ्ना उम्मेदवार उठाउने निर्णय गरेको उहाँले बताउनुभयो । उम्मेदवार कसलाई बनाउने भन्ने चाहिँ तय भइनसकेको उहाँको भनाइ छ ।
माओवादीको इलाम जिल्ला कमिटीले इलाम २ मा केन्द्रीय सदस्य तथा इलाम जिल्ला इन्चार्ज धिरेन्द्र शर्मा, प्रदेश कमिटी सदस्यहरू उर्मिला तामाङ, अनिल बराइली र ओम गुरूङको नाम सिफारिस गरेको छ ।
यस्तै, नेकपा एसले प्रतिनिधि सभा सदस्यतर्फ इलाम २ मा जीतबहादुर राई र बझाङ प्रदेश सभा सदस्यतर्फ दिलबहादुर सिंहलाई उम्मेदवार बनाउने निश्चित भएको पार्टीका सम्मानित नेता झलनाथ खनालले जानकारी दिनुभयो ।
सत्तारुढ घटक राष्ट्रिय स्वतन्त्र पार्टी रास्वपाले इलाममा उम्मेदवार चयन गर्न आन्तरिक निर्वाचनको कार्यक्रम तय गरेको छ ।
उपनिर्वाचनका लागि यही चैत २४ गते उम्मेदवारको मनोनयन दर्ता गर्ने कार्यक्रम छ।
प्रकाशित मिति: बुधबार, चैत १४, २०८०, ११:५५
