काठमाडौँ । विगतमा सरकारले दिएको उपदान (गोल्डेन हेन्डसेक) सुविधा लिन छुटेका विद्यालयका शिक्षकलाई सरकारले उक्त सुविधाका लागि फेरि अवसर दिएको छ ।
यस्तो सुविधा लिन नपाएकालाई सम्बन्धित जिल्लाको शिक्षा विकास तथा समन्वय एकाइमा निवेदन दिन शिक्षा तथा मानव स्रोत विकास केन्द्रले अनुरोध गरेको छ ।
सरकारले २०७३ साल असार १५ गतेसम्म अस्थायी रूपमा कार्यरत शिक्षकलाई यस्तो सुविधा दिएको थियो ।
सोहीबमोजिम मन्त्रालयले २०७५ चैत ११ गतेको सचिवस्तरीय निणर्य गरेर पहिलो पटक सूचना प्रकाशित गरेको थियो ।
सो सूचनाअनुसार उक्त सेवाबाट वञ्चित भएको भन्दै केहीले सम्बन्धित जिल्लाको शिक्षा विकास तथा समन्वय एकाइमा निवेदन दिएका केन्द्रले जनाएको छ ।
शिक्षक सम्बद्ध सङ्घसङ्गठनले पनि छुटेकाहरूलाई सोहीबमोजिम सुविधा दिन मन्त्रालय तथा केन्द्रलाई अनुरोध गरेको थियो ।
त्यसका लागि केन्द्रले सूचना प्रकाशन गरेर सो सुविधा नपाएका अस्थायी शिक्षकलाई निवेदन पेस गर्न अनुरोध गरेको छ तर कति दिनभित्रमा निवेदन पेस गर्ने भन्ने विषयमा भने केन्द्रले केही खुलाएको छैन ।
यसअघि गत असोज १२ गते पनि मन्त्रालयले मन्त्रीस्तरीय निणर्य गरेर ३० दिनभित्र राष्ट्रिय किताबखाना (शिक्षक) मा निवेदन पेस गर्न भनेको थियो ।
निवेदनका साथ सम्बन्धित शिक्षकले सम्बन्धित तहको शैक्षिक योग्यताको प्रमाणपत्र, नागरिकताको प्रमाणपत्र, सम्बन्धित तहको नियुक्तिपत्र वा समर्थनपत्रलगायतका कागजपत्र पेस गर्न अनुरोध गरेको छ ।
प्रकाशित मिति: आइतबार, पुस १७, २०७९, ०९:२१
