पर्वत । पर्वतमा उद्यमी महिलाको सङ्ख्या बढ्दै गएको छ । सरकारले उद्यमी महिलाका लागि विशेष सुविधा दिन थालेपछि उद्यम गर्ने महिलाको सङ्ख्या बढ्न थालेको हो ।
महिलाहरूले चलाएका उद्योग नमूनाका रुपमा मात्रै सञ्चालन भैरहेका छैनन, उनीहरूले घरका पुरुष सदस्यको भन्दा बढी आम्दानीसमेत गर्दै आएका छन् । मोदी गाउँपालिका ४ क्याङका जसमया पुन बिहानदेखि साँझसम्म अल्लो उद्योगमा काम गर्नुहुन्छ ।
गाउँमा खेर गएको अल्लो संकलन गरी विभिन्न पोशाक र उपहारका सामान बनाउने उद्योग सञ्चालन गरेपछि जसमाया आत्मानिर्भर बन्नुभएको छ ।
जसमाया जस्तै उद्योग चलाउने मोदी ४ हलहलेका सौभाग्य पुन र सोनिया पुन पनि घरको कामसँगै आफूले सञ्चालन गरेको ढाका बुनाई उद्योगमा ब्यस्त हुनुहुन्छ ।
दुबै जनाले मिलेर सञ्चालन गरेको ढाकाको कपडा बनाउने उद्योगमा अरु महिलाले पनि रोजगारी पाएका छन् । उत्पादन गरेका सामान स्वदेशमा मात्रै नभएर बिदेशमा पनि उत्तिकै माग भइरहेको छ । फलेबास ५ खानीगाउँका केशा परियारले पनि गाउँमै सिलाइबुनाइ पसल सञ्चालन गर्नुभएको छ ।
पहिले बालीघरे प्रथामा चल्दै आएको कपडा सिलाउने पेशालाई केशाले व्यावसायिक बनाउन पनि उत्तिकै भूमिका खेल्नुभएको छ । घरेलु तथा साना उद्योग कार्यालय, पर्वतको तथ्याङ्क अनुसार महिला उद्यमीको सङ्ख्या ५ सय ३० रहेको छ ।
महिला उद्यमीको सङ्ख्या बढेसंँगै महिला रोजगारको सङ्ख्यामा समेत वृद्धि भएको घरेलु तथा साना उद्योग कार्यालयका प्रमुख गोबिन्द पौडेलले बताउनुभयो ।
महिला सक्षम भए घर, परिवार समाज र देश नै समृद्ध हुनसक्छ । दिगो विकासको लक्ष्यमा रोजगारी सिर्जना, गरिबीको अन्त्य, लैङ्गक समानता जस्ता महिला सशक्तिकरणसम्बन्धी मुद्दा समावेश छन् ।
सरकारले सन् २०३० सम्म यी लक्ष्य पूरा गर्न महिलाहरूले सञ्चालन गरेका उद्योगलाई थप प्रोत्साहन गर्दै जानुपर्छ ।
प्रकाशित मिति: आइतबार, मंसिर ८, २०७६
