काठमाडौं ।
बागमती प्रदेशले माध्यामिक शिक्षा परीक्षा (एसईई) र कक्षा ११ को परीक्षा नलिए पनि हुने विकल्प अगाडि सारेको छ ।
प्रदेशका सामाजिक विकास मन्त्री युवराज दुलालले विद्यालय तहको अन्तिम परीक्षा १२ भएकाले अन्य परीक्षा राष्ट्रियस्तरमा गर्न नपर्ने बताउनु भएको हो ।
शिक्षा पत्रकार समूहले कोरोना प्रभाव र बागमती प्रदेशले शिक्षा व्यवस्थापनका लागि गरेको तयारीबारे सामाजिक विकासमन्त्री दुलालसँग आज गरेको भिडियो संवादमा उहाँले यस्तो बताउनु भएको हो ।
कक्षा १२ को परीक्षा लकडाउन खुलेपछि विद्यालयलाई होम सेन्टर मानेर सञ्चालन गर्नुपर्ने पक्षमा प्रदेश रहेको भन्दै मन्त्री दुलालले यही सुझाव आफूले शिक्षा, विज्ञान तथा प्रविधिमन्त्रीलाई समेत दिएको बताउनुभयो ।
विद्यालयतहका सबै पाठ्यपुस्तक विद्यालयले नै व्यवस्थापन गरि विद्यार्थीको घरघरमा पु¥याउने तथा कक्षा ६ देखि १० सम्मका अङ्ग्रेजी, गणित र विज्ञान विषयका कक्षाहरू तालिका मिलाएर स्थानीय एवम् केन्द्रिय टेलिभिजनबाट सञ्चालन गर्नुपर्ने सुझाव शिक्षामन्त्री समक्ष राखेको उहाँले जानकारी दिनुभयो ।
केही विषयका शिक्षण सिकाइ स्थानीय एफएम रेडियोमार्फत् सञ्चालन गर्ने र स्थान र परिवेश अनुसार अनलाइन र अफलाइनमार्फत् सिकाइका अवसरहरू प्रदान गर्ने विकल्प बारे पनि प्रदेशले तयारी गरेको मन्त्री दुलालको भनाइ छ ।
अनलाइनको पहुँच सबै स्थानमा नपुगेको र यसका लागि चाहिने उपकरणको व्यवस्थापन सजिलो नभएकाले पूरै अनलाइन शिक्षामा जान नसकिने भएकाले विभिन्न दूर शिक्षाका विधिहरु अपनाउनुपर्ने प्रदेशको दृष्टिकोण रहेको मन्त्री दुलालले स्पष्ट पार्नु भयो ।
लकडाउन पछि दुगर्म र विकट क्षेत्र जहाँ बाहिरी व्यक्तिहरूको आगमन हुँदैन त्यस्ता स्थानहरू पहिचान गरेर जिल्ला विपद् व्यवस्थापन समितिसँगको समन्वय र स्वास्थ्य कार्यालयको सिफारिसमा स्थानीय तहबाट विद्यालय खोली विद्यार्थी संख्याका आधारमा आलोपालो गरी अध्ययन अध्यापन गर्न सहजीकरण गर्न सकिने पनि मन्त्री दुलालको भनाइ छ ।
‘विश्वबाटै कोरोना भाइरसको महामारी अन्त्य नभएसम्म वा औषधी पत्ता नलागेसम्म लकडाउन सकिएपनि तत्काल विद्यार्थी उपस्थित गराएर विद्यालय सञ्चालनको वातावरण बनिहाल्दैन’– मन्त्री दुलाले भन्नुभयो, ‘यसैकारण स्थायी समाधान नहुँदासम्म सरकारले वैकल्पिक बाटो अपनाएर जानुपर्छ ।’
यी सबै सुझावहरू प्रदेशले संघीय सरकार समक्ष राखेको उहाँले जानकारी दिनुभयो ।
मन्त्री दुलालका अनुसार बागमती प्रदेशले विभिन्न पक्षहरुसँगको छलफल र सुझावका आधारमा प्रदेशभरीको शैक्षिक गतिविधिमा एकरुपता गर्न र सिकाइ क्रियाकलापलाई निरनतरता दिन स्थानीय तहहरूलाई पत्राचार गरेको र सोही अनुसार समन्वय पनि भइरहेको छ ।
प्रदेश सरकारले निर्णय गरी वैकल्पिक माध्यमबाट नतिजा प्रकाशन र भर्ना शुरु गर्न, विद्यार्थीहरूलाई पाठ्यपुस्तक उपलब्ध गराउन स्थानीय तहहरूलाई पत्राचार गरेको प्रदेश सरकारले बताएको छ ।
पाठ्यपुस्तक ढुवानी र वितरणलाई सहज बनाउने, नियमित कक्षा सञ्चालन नहुँदासम्म बालबालिकालाई घरमै बसेर सिक्ने अवसर सुनिश्चित गर्न राष्ट्रिय तथा स्थानीय सञ्चार माध्यमबाट प्रशारण भइरहेको दूर शिक्षा कार्यक्रम तथा अन्य वैकल्पिक अनलाइन, अफलाइन सिकाइका अवसरमा सहभागी हुने व्यवस्था मिलाउन पत्राचार गरिएको भन्दै प्रदेश सरकारले प्रदेशले केन्द्रबाट दूर शिक्षाका सामग्री ल्याएर विद्यार्थीसम्म पु¥याउन प्रयास गरिरहेको छ ।
प्रकाशित मिति: बिहीबार, वैशाख १८, २०७७, २०:०४
