सिन्धुपाल्चोक ।
सिन्धुपालचोकको मेलम्ची १ भोटेचौर खाल्डेमा स्थानीयले बाटो बन्द गराएका छन् । प्रकोपको बेला ओहोरदोहोर बढि भएपछि स्थानीयले रुख तेस्र्याएर बाटोबन्द गरेको स्थानीय रमेश चौलागाईंले जानकारी दिनुभयो ।
अत्यावश्यक यातायातका साधन र व्यक्तिलाई भने अवरोध नगरिने स्थानीयले बताएका छन् । सिन्धुपाल्चोकबाट काठमाडौं ओहोरदोहोर गर्नेको संख्या निकै रहेको स्थानीयको भनाइ छ ।
काठमाडौं र सिन्धुपाल्चोकको नाकाको रुपमा रहेको भोटेचौरमा स्वास्थ्य जाँच गर्ने व्यवस्था नभएकाले रोगको संक्रमण बढ्न सक्ने भन्दै बाटो बन्द गरिएको स्थानीयको भनाइ छ ।
बाटो अबरुद्ध भएपछी ईलाका प्रहरी कार्यालय मेलम्चीबाट प्रहरी परिचालन गरिएको प्रहरी निरिक्षक फलबहादुर तमाङले जानकारी दिनुभयो ।
एक सय ५० भन्दा बढि नियन्त्रणमा
सिन्धुपाल्चोकको विभिन्न स्थानमा लकडाउन अवज्ञा गर्ने १५० जना भन्दा बढिलाई प्रहरीले नियन्त्रणमा लिएको छ ।
पक्राउ परेकाहरूलाई लकडाउनको औचित्यका बारेमा ३० मिनेट सम्झाइबुझाइ गरेर पठाउने गरेको र जवर्जस्ती गर्नेलाई स्ांक्रामक रोग ऐन २०२० अनुसार कारवाही चलाउने सिन्धुपाल्चोकका डिएसपी माधव काफ्लेले जानकारी दिनुभयो ।
नागरिककै हितका निम्ति गरिएको लकडाउन पूर्ण रुपमा पालन गर्न अपिल गर्दै कडाईका साथ सिमा क्षेत्रमा प्रहरी परिचालन गर्ने प्रमुख जिल्ला अधिकारी उमेश कुमार ढकालले बताउनुभयो ।
यसैबीच, मेलम्ची नगरपालिका वडा नम्बर ६ तालामाराङ का ३५ वर्षका कल्पना आचार्य दुबईबाट इन्डिया, काठमाडौं हुँदै गाउँ आएको जानकारी प्राप्त भएपछि तत्काल स्वास्थ्यकर्मीको सम्पर्कमा ल्याउन जिल्ला समन्वय समितिका प्रमुख कृष्ण गोपाल तामाङले अनुरोध गर्नुभएको थियो ।
हाल आचार्य चिकित्सकको निगरानीमा रहेको इन्सपेक्टर तामाङले जानकारी दिनुभयो ।
मेलम्ची १२ बाँसबारीका दुईजना युवा भारतबाट घर फर्केको र उनीहरू होम क्वारेन्टाइनमा नबसेको जानकारी पाएपछि उनीहरूलाई समेत नियन्त्रणमा लिएर स्वास्थ्य परिक्षण गर्न लगाइएको उहाँले बताउनुभयो ।
चौतारास्थित जिल्ला अस्पतालमा दुवाईबाट घर फर्केका ३ जनालाई स्वास्थ्य परिक्षण गरि होम क्वारेन्टाईनमा सुरक्षित बसि रहेको हस्पिटलका चिकित्सक को भनाई छ ।
संक्रमित युवतीसँगै जहाजमा आएका तीन जना क्वारेन्टाइनमा
फ्रान्सबाट कतार हुँदै नेपाल आएकी युवतीमा कोरोना संक्रमण देखिएपछि एउटै विमान प्रयोग गरी आएका सिन्धुपाल्चोकाका तीनै जनालाई क्वारेन्टाइनमा राखिएको छ ।उनीहरू गत चैत्र ४ गते एउटै विमानमा काठमाडांै आएका थिए ।
मंगलवार कतार एयरवेयजमा आएका यात्रुहरूको विवरण सार्वजनिक भएपछि सिन्धुपाल्चोकका तीन जना रहेको खुलेको थियो ।
एउटै जहाज प्रयोग गरेका जिल्लाका तीनै जनाको विवरण जिल्ला प्रहरी कार्यालयले सार्वजनिक गरेको छ । युवती आएको जहाजमा आएका सिन्धुपाल्चोकका तीन जना भएको जिल्ला प्रहरी कार्यालय सिन्धुपाल्चोकका डिएसपी माधव काफ्लेले जानकारी दिनुभयो ।
उनीहरुमध्ये एक जना होम क्वारेन्टाइनमा, एक जना काठमाडौ जोरपाटीस्थित ह्वाइट गुम्वा र अर्का व्यक्ति स्वयम्भूको नेपाल विद्युत प्राधिकरणको क्वारेन्टाइनमा बसेका जिल्ला समन्वय समितिका प्रमुख कृष्ण गोपाल तामाङले जानकारी दिनुभयो ।
उनीहरूको परिवारलाई समेत होम क्वारेन्टाइनमा बस्न आग्रह गरिसकेको उहाँको भनाइ छ ।
प्रकाशित मिति: बिहीबार, चैत १३, २०७६, १४:१४
