CIN Khabar

समाज

काभ्रेकी मैयालाई पैसा राख्ने ठाउँको अभाव नागरिकता नबनन्दा बैँकहरुले खोलिदिएनन् खाता, बुझेर नागरिकताका लागि पहल गर्ने वडाअध्यक्षको प्रतिबद्धता

शोभा हुमागाईँ शुक्रबार, पुस २, २०७८, १०:०९:००

एक छलफलमा आफ्नो समस्या राख्दै मैया परियार । दायाँबाट पहिलो ।

काभ्रे । काभ्रेको नमोबुद्ध नगरपालिकाका मैया परियारलाई नागरिकता लिन समस्या भएको छ ।

नेपाल सरकारले १६ वर्ष पुगेपछि नेपाली नागरिकलाई नागरिकता दिने गरे पनि ५१ वर्ष पुग्दा पनि आफू नागरिकताविहीन हुनुपरेको परियारले गुनासो गर्नुभयो ।

३० वर्षअघि विवाह गर्नुभएका उहाँ ६ वर्षपछि श्रीमान र परिवारबाट अलग हुनुभएको थियो । माइती घरमा बुबाआमा बितिसकेको र बिहे गरेको घरको कुनै अत्तोपत्तो नहुँदा समस्या भएको हो ।

शारीरिक रूपमा कम्जोर उहाँले दैनिकी चलाउन अरुको घरमा काम गर्न थालेको करिब १० वर्ष भएको छ ।

नागरिकता नहुँदा सरकारबाट पाउने सेवासुविधा रोकिएको सँगै कमाएको केहि रुपैयाँसमेत बचत गर्न नपाएको मैयाको भनाइ छ ।

नमोबुद्ध नगरपालिका ४ का वडाअध्यक्ष उद्धब काफ्लेले भने परियारलाई वडा कार्यालयमा सम्पर्क गर्न अनुरोध गर्नुभएको छ ।

जिल्ला प्रशासन कार्यालय काभ्रेका अनुसार नागरिकताको समस्या भएका तर नपाएकाहरू वार्षिक करिब ११ सयको सङ्ख्यामा आउने गरेका छन् ।

उनीहरूलाई आवश्यक समन्वयका लागि स्थानीय तह र जनप्रतिनिधिसँग समन्वय गर्दै काभ्रेका प्रमुख जिल्ला अधिकारी शिवराम पोखरेलले बताउनुभयो ।

विशेषगरी कम उमेरमा विवाह गरेर श्रीमानसँग राम्रो सम्बन्ध नभएका, नागरिकता नबनाइकनै विवाह अनि सम्बन्धविच्छेद गरेका महिलाहरूलाई समस्यामा पर्ने गरेको स्थानीय जनप्रतिनिधिको भनाइ छ ।

प्रकाशित मिति: शुक्रबार, पुस २, २०७८, १०:०९:००

शोभा हुमागाईँ

हुमागाईँ काभ्रेको भकुन्डेबेसीमा रहेको रेडियो रोशीमा कार्यरत हुनुहुन्छ ।

प्रतिक्रिया दिनुहोस्