दाङ । हिजो भएको स्थानीय तहको निर्वाचनमा दाङमा ७१ दशमलव १६ प्रतिशत मत खसेको छ । जिल्लाको ९९ वटा वडामा सम्पन्न मतदानमा २ लाख ८३ हजार ९८ जनाले मतदान गरेका छन् ।
जिल्लामा कुल मतदाताको सङ्ख्या ४ लाख ९ हजार ९ सय २ थियो । मतदानमा पुरुषभन्दा महिला मतदाताले उल्लेख्य सङ्ख्यामा भाग लिएका छन् ।
१ लाख ५४ हजार १ सय २२ जना महिला मतदाताले मतदान गरेका छन् भने १ लाख २८ हजार ९ सय ७६ जना पुरुष मतदाताले दाङमा मतदान गरेका प्रदेश निर्वाचन कार्यालय दाङले जनाएको छ ।
जिल्लामा ७६ दशमलव ४ प्रतिशत महिला र ६५ दशमलव ७६ प्रतिशत पुरुषले मतदानमा भाग लिएको पाइएको छ ।
दाङमा रहेका १० वटै पालिकामध्ये राजपुर गाउँपालिकामा सबै भन्दा धेरै मत खसेको छ । राजपुरमा सबैभन्दा कम मतदाता रहेकोमा पालिकाहरुमध्ये सबैभन्दा धेरै मतदाताले निर्वाचनमा भाग लिएका छन् ।
राजपुरमा ७४ दशमलव ६७ प्रतिशत मत खसेको छ । त्यहाँ १५ हजार ७ सय २३ जना मतदाता रहेकामा ११ हजार ७ सय ४१ जनाले मतदान गरेका छन् ।
दाङको घोराही उपमहानगरपालिकामा सबैभन्दा बढी मतदाता रहेकोमा ६७ दशमलव ७६ प्रतिशतले मात्रै निर्वाचनमा भाग लिएका छन् ।
घोराहीमा रहेका १ लाख १२ हजार ९ सय २७ मतदातामध्ये ७६ हजार ५ सय २१ जनाले मतदान गरेका छन् । घोराहीमा ४० वटा मतदानस्थलमार्फत १ सय २६ मतदान केन्द्रबाट मतदान भएको छ ।
प्रकाशित मिति: शनिबार, वैशाख ३१, २०७९, १०:१७
