काठमाडौँ । सामुदायिक वन उपभोक्ता महासंघ (फेकोफन) नेपालले सुदूरपश्चिम प्रदेश सरकारले बाजुराको बडीमालिका र अछामको रामारोशन क्षेत्रलाई जोडेर “बडीमालिका–रामारोशन वन संरक्षण क्षेत्र“ घोषणा गर्ने निर्णय गरेकोमा असहमति जनाउँदै उक्त निर्णय तत्काल खारेज गर्न माग गरेको छ ।
महासङ्घका अध्यक्ष ठाकुर भण्डारीले आज विज्ञप्ति निकाल्दै संरक्षणको नाममा सामुदायिक वनमाथिको स्थानीय समुदायको अधिकार हनन् हुने गरी विभिन्न संरक्षित क्षेत्रहरू घोषणा तथा विस्तार गर्ने कार्यले वन क्षेत्रमा मानव अधिकारको उल्लङ्घन र लोकतन्त्रको उपहास भइरहेको उल्लेख गर्नुभएको छ ।
वनमा आश्रित स्थानीय समुदायको जीविकोपार्जन खोसिँदै गएको उल्लेख गर्दै निर्णय तत्काल खारेज नगरिए सामुदायिक वन उपभोक्ता समूहहरू विरोधमा उत्रन बाध्य हुने पनि चेतावनी दिइएको छ ।
प्रकाशित मिति: बिहीबार, साउन २८, २०८३
