काठमाडौँ । बितेको ६ घण्टामा गण्डकी प्रदेशमा सबैभन्दा धेरै पानी परेको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार कास्कीको लुम्ले क्षेत्रमा ९३ दशम्लव ८ मिलिमिटर पानी परेको छ । घलेखर्क क्षेत्रमा ७९ दशम्लव ६ मिलिमिटर पानी परेको छ ।
गण्डकी प्रदेशका अधिकाश स्थानमा पानी पर्दा बागमती, लुम्बिनी र गण्डकीको सीमा क्षेत्रमा पनि पानीको झरी परेको छ । नवलपुर, परासी र बर्दघाट क्षेत्रमा बितेको ६ घण्टामा क्रमश ९१ दशम्लव २, ८८ दशम्लव ६ र ८२ दशम्लव २ पानी परेको महाशाखाले जनाएको छ ।
लगातार परेको पानीका कारण त्रिशुली, मर्स्याङ्दी, सेती गण्डकी, काली गण्डकी लगायतका नदीहरुमा बाढी बढीरहेको छ ।
गण्डकी प्रदेशका पहाडी जिल्लामा आज सॅाझसम्म थप पानी पर्ने पूर्वानुमान रहेकोले नारायणी नदी आसपास डुबान भइरहने ठाउँका बासिन्दा सॅाझसम्मै सतर्क रहनुपर्ने राष्ट्रिय विपद् जोखिम न्यूनिकरण तथा व्यवस्थापन प्राधिकरणका उपसचिव, प्रतिकार्य शाखाका प्रमुख रामबहादुर केसीले सीआईएनसँग बताउनुभयो ।
आज देशभर साधारणतया बादल लाग्नेछ। कोशी, बागमती, गण्डकी प्रदेशको हिमाली भू-भागका धेरै स्थानमा तथा लुम्बिनी कर्णाली र सुदूरपश्चिम प्रदेशका केही स्थानमा मध्यमसम्मको पानी र हिउँ पर्ने सम्भावना छ।
कोशी, बागमती, गण्डकी र लुम्बिनी प्रदेशका पहाडी र तराई भू-भाग साथै मधेश प्रदेशका धेरै स्थानमा मेघगर्जन/चट्याङ्ग सहित मध्यमसम्मको पानी पर्ने सम्भावना रहेको मौसम पूर्वानुमान महाशाले जनाएको छ।
कर्णाली प्रदेशका पहाडी भू-भाग र सुदूरपश्चिम प्रदेशका पहाडी र तराई भू-भागका केही स्थानमा मेघगर्जन/चट्याङ्गसहित मध्यमसम्मको वर्षाको सम्भावना छ।
बागमती र गण्डकी प्रदेशका हिमाली, पहाडी र तराई भू-भाग, कोशी प्रदेशका हिमाली र पहाडी भू-भाग, मधेश प्रदेश तथा लुम्बिनी प्रदेशको पहाडी र तराई भू-भागका एक-दुई स्थानमा भारी देखि धेरै भारी वर्षाको सम्भावना छ ।
आज राति देशका हिमाली र पहाडी भू-भागका केही स्थानमा मध्यमसम्मको वर्षा/हिमपातको सम्भावना छ । देशका तराई भू-भागका थोरै स्थानमा मध्यम खालको पानी पर्ने सम्भावना रहेकाले सावधानी अपनाउनुपर्ने देखिएको छ ।
प्रकाशित मिति: बिहीबार, साउन २१, २०८३
