काठमाडौँ । पछिल्लो १ घण्टामा सबैभन्दा धेरै पानी कञ्चनपुरको बेलौरी क्षेत्रमा परेको छ । मौसम पूर्वानुमान महाशाखाका अनुसार बेलौरीको शान्तिपुर क्षेत्रमा ३२ दश्मलव ८ मिलिमिटर पानी परेको छ ।
हाल मनसुनको न्यून चापीय रेखा सरदर स्थानभन्दा उत्तरतर्फ नेपालको तराई भू-भाग नजिक रहेको र कोशी, कर्णाली प्रदेशका केही स्थान तथा बागमती, गण्डकी, लुम्बिनी र सुदूरपश्चिम प्रदेशका थोरै स्थानमा तथा मधेश प्रदेशको एकदुई स्थानमा मेघगर्जन चट्याङ्गसहित हल्कादेखि मध्यम खालको पानी परिरहेको महाशाखाले जनाएको छ ।
आज दिउँसो देशको हिमाली तथा पहाडी भू-भागका केही स्थानमा मध्यमसम्मको पानी र हिउँ पर्ने सम्भावना छ।
कोशी प्रदेशको तराई भू-भागको केही स्थान तथा मधेश प्रदेश र बागमती, गण्डकी, लुम्बिनी र सुदूरपश्चिम प्रदेशका तराई भू-भाग थोरै स्थानमा मेघगर्जन/चट्याङ्गसहित मध्यम खालको पानी पर्ने सम्भावना छ। कोशी, बागमती र गण्डकी प्रदेशका हिमाली र पहाडी भू-भाग तथा लुम्बिनी प्रदेशको पहाडी भू-भागका एक-दुई स्थानमा भने भारी वर्षाको सम्भावना छ ।
आज राति कोशी, बागमती, गण्डकी प्रदेशको हिमाली भू-भागका केही स्थान तथा लुम्बिनी, कर्णाली र सुदूरपश्चिम प्रदेशको हिमाली भू-भागको थोरै स्थानमा मध्यम खालको पानी र हिउँ पर्ने सम्भावना छ।
कोशी, बागमती, गण्डकी र लुम्बिनी प्रदेशका पहाडी र तराई भू-भागका धेरै स्थानमा मेघगर्जन/चट्याङसहित मध्यमसम्मको वर्षाको सम्भावना छ। कर्णाली प्रदेशका पहाडी भू-भाग र सुदूरपश्चिम प्रदेशका पहाडी र तराई भू-भाग तथा मधेश प्रदेशका केही स्थानमा मेघगर्जन/चट्याङसहित मध्य पानी पर्ने सम्भावना रहेकाले सावधानी अपनाउन महाशाखाले अनुरोध गरेको छ।
कोशी प्रदेशको पहाडी र तराई भू-भाग, बागमती र गण्डकी प्रदेशका हिमाली र पहाडी भू-भाग तथा मधेश प्रदेशको एक-दुई स्थानमा भने भारी वर्षाको सम्भावना छ ।
प्रकाशित मिति: मंगलबार, साउन १९, २०८३
