काठमाडौँ । सरकारले दलित सेल निर्माणका लागि प्रहरीलाई पत्राचार गर्ने भएको छ ।
प्रतिनिधिसभा अन्तर्गतको कानुन न्याय तथा मानव अधिकार समितिले सरकारलाई यसबारेमा निर्देशन दिएको १६ महिना बितिसकेको छ । तर, अझै पनि दलित सेल निर्माणमा भएको छैन ।
समितिले निर्देशन दिए अनुसार गृह मन्त्रालयलले काम पनि थालेको छैन । समितिका सभापति कृष्णभक्त पोखरेलले सरकारलाई बारम्वार ताकेता गर्दा पनि छुट्टै प्रहरी सेल गठन नभएको बताउनुभयो ।
गृह मन्त्रालयका प्रवक्ता फनिन्द्रमणि पोखरेल भने यसअघि नै दलित सेल निर्माणका लागि प्रहरीलाई निर्देशन दिएको दावी गर्नुहुन्छ । तर यसबारेमा कुनै निर्देशन नआएको प्रहरी प्रवक्ता बसन्त बहादुर कुँवरको भनाइ छ ।
सरकारले देशलाइ छुवाछुतमुक्त राष्ट्र घोषणा गरेको १५ वर्ष पुरा भयो । तर अझै पनि दलितमाथीको विभेद कम भएको छैन ।
यस्तो बेलामा चाल्नुपर्ने कदमका लागि सरकारी निकाय नै गम्भिर भएका छैनन् ।
दलित सेल निमाणर्मा सरकारले चासो नदेखाउनुले दलितका सबालमा राज्य गम्भीर नभएको राष्ट्रिय माानबअधिकार आयोगका सचिव डाक्टर टिकाराम पोखरलको बुझाइ छ ।
गत आर्थिक वर्षमा मात्रै दलित समुदायमाथिका २५ ओटा विभेदका घटना प्रहरीमा दर्ता भएका छन् । दर्ता नभएका थुप्रै घटनाहरु छन्, जसले दलित समुदायका नागरिक विभेदको महसुस गर्छन् ।
प्रकाशित मिति: मंगलबार, कात्तिक ९, २०७८, ०९:१४
