डडेल्धुरा । डडेलधुराको सामुदायिक रेडियो अमरगढी एफएम आज साउन २६ गतेदेखि १७ औँ वर्षमा प्रवेश गरेको छ ।
वार्षिकाृत्सवको अवसरमा रेडियोले जिल्ला स्थित सम्पूर्ण सरोकारवाला निकाय, राजनीतिक दल, सरकारी कार्यालयका प्रमुख तथा प्रतिनिधि, स्थानीय तह, पत्रकारलगायत विभिन्न क्षेत्रका व्यक्तिहरूसँग शुभकामना आदानप्रदान तथा रक्तदान कार्यक्रम गर्दैछ ।
नेपाल रेडक्रस सोसाइटी जिल्ला शाखा डडेलधुरामा कार्यक्रम आयोजना गरिने रेडियोले जनाएको छ ।
रेडियोका स्टेशन म्यानेजर ममता भट्टका अनुसार वार्षिकोत्सवलाई औपचारिक कार्यक्रमका रूपमा सीमित नगरी जिल्लाका विभिन्न क्षेत्रका सरोकारवाला निकायलाई एउटै ठाउँमा जोड्दै सामाजिक उत्तरदायित्वसँग जोडिएको कार्यक्रम गर्न लागिएको हो ।
रेडियो र समुदायबीचको सम्बन्धलाई थप बलियो बनाउने तथा रेडियोले समाजप्रति निर्वाह गर्नुपर्ने जिम्मेवारीलाई निरन्तरता दिने उद्देश्यले कार्यक्रम आयोजना गरिएको उहाँले बताउनुभयो ।
रेडियोका प्रबन्धक छत्र साउदले रेडियो अमरगढी एफएमले स्थापनाकालदेखि नै समुदायका आवाज, सवाल र समस्यालाई प्राथमिकताका साथ उठाउँदै आएको बताउनुभयो ।
उहाँले वार्षिकोत्सवको अवसरमा सरोकारवालासँग शुभकामना आदानप्रदानसँगै रक्तदानजस्तो सामाजिक कार्यलाई जोड्नु रेडियोको सामाजिक उत्तरदायित्वको निरन्तरता भएको उल्लेख गर्नुभयो ।
२०६७ साल साउन २६ गते स्थापना भएको यस रेडियोले ‘घरघरको आवाज’ भन्ने मूल नाराका साथ समुदायको आवाजलाई प्राथमिकता दिँदै सूचना, शिक्षा, मनोरञ्जन र सामाजिक उत्तरदायित्वलाई केन्द्रमा राखेर निरन्तर सेवा दिँदै आएको छ ।
दैनिक १८ घण्टा (बिहान ५ बजेदेखि राति ११ बजेसम्म) नियमित प्रसारण गर्दै आएको रेडियोले नेपाली तथा डोटेली भाषामा समाचार, समसामयिक बहस, विकास, कृषि, शिक्षा, स्वास्थ्य, संस्कृति, मनोरञ्जन र जनचासोका कार्यक्रम उत्पादन तथा प्रसारण गर्दै आएको छ ।
प्रकाशित मिति: मंगलबार, साउन २६, २०८३
