काठमाडौँ । नारायणी नदीमा जलसतहले खतराको तह पार गरेपछि उच्च सावधानी अपनाउन बाढी पूर्वानुमान शाखाले अनुरोध गरेको छ ।
जल तथा ऊर्जा आयोगको सचिवालयअन्तर्गत जल विज्ञान तथा जलस्रोत अनुसन्धान केन्द्र, बाढी पूर्वानुमान शाखाले नारायणी नदी तथा यसका सहायक नदीमा उच्च बाढीको जोखिम रहेको भन्दै विशेष सूचना जारी गरेको हो। शाखाका अनुसार नारायणी नदीमा हाल जलसतह खतराको तह ९ मिटरभन्दा माथि पुगेको छ।
नदीको जलसतह करिब ११ मिटर पुगेको र अझै बढ्दो क्रममा रहेको जनाइएको छ। नारायणीका प्रमुख सहायक नदीमध्ये कालीगण्डकीमा बहाव खतराको तहभन्दा उल्लेख्य रूपमा माथि पुगेको छ।
सेती, मादी, मर्स्याङ्दी, दरौँदी र चेपे नदीमा समेत पानीको बहाव सतर्कता तहभन्दा माथि रहेर बढ्दो क्रममा रहेको जनाइएको छ।
बुढीगण्डकी र त्रिशूली नदीमा पनि बहाव सतर्कता तह नजिक पुगेको र बढ्दो क्रममा रहेको शाखाले जनाएको छ। उपलब्ध नदी बहाव तथा बाढी पूर्वानुमानका आधारमा देवघाटस्थित बाढी मापन केन्द्रमा नारायणी नदीको बहाव आज दिउँसोसम्म बढ्ने अनुमान गरिएको छ।
नदीको जलसतह अधिकतम करिब १३ मिटर पुग्न सक्ने र आज बिहान करिब ११ बजे आसपास उच्चतम तहमा पुग्ने सम्भावना रहेको सूचनामा उल्लेख छ।
आज साँझसम्म नदीको जलसतह खतराको तहभन्दा माथि रहने सम्भावना रहेको बाढी पूर्वानुमान शाखाले जनाएको छ।
नारायणी नदीमा आएको उच्च बहावका कारण चितवन तथा नवलपरासी जिल्लाका नदी आसपासका होचा तथा डुबान सम्भावित क्षेत्रमा बाढी तथा डुबानको जोखिम उच्च रहेको छ।
विशेषगरी तटीय क्षेत्र, नदी किनार, तल्लो भूभाग तथा कमजोर तटबन्ध वा संरचना भएका स्थानमा विशेष सावधानी अपनाउन शाखाले आग्रह गरेको छ।
शाखाले चितवन र नवलपरासीका नारायणी नदी आसपासका होचा तथा डुबान सम्भावित स्थानमा रहेका नागरिकलाई तत्काल सुरक्षित स्थानमा जान वा स्थानान्तरण हुन अनुरोध गरेको छ।
नारायणी तथा यसका सहायक नदीहरूको तटीय क्षेत्रमा आवतजावत नगर्न, नदी किनार, पुल, तटबन्ध तथा जोखिमयुक्त स्थानमा अनावश्यक भीड नगर्न पनि आग्रह गरिएको छ।
कालीगण्डकी, सेती, मादी, मर्स्याङ्दी, दरौँदी, चेपे, बुढीगण्डकी तथा त्रिशूली नदी र तिनका शाखा खोलानालामा समेत आज साँझसम्म उच्च सतर्कता अपनाउन शाखाले आग्रह गरेको छ।
प्रकाशित मिति: आइतबार, असोज ११, २०८३
