काठमाडौँ । विश्वका विभिन्न द्वन्द्वग्रस्त क्षेत्रहरूमा शान्ति स्थापनार्थ खटिई कार्य गरिसकेका र हाल तैनाथ रहेका शान्ति सैनिकहरूको योगदानको सम्मानमा नेपाली सेनाले आज विशेष कार्यक्रम गरेर सम्मान तथा कदरपत्र प्रदान गरेको छ ।
हरेक वर्ष मे २९ मा मनाइने "International Day of UN Peacekeepers" को अवसरमा नेपाली सेनाको आयोजनामा आज वीरेन्द्र शान्ति कार्य तालिम केन्द्र, पाँचखालमा विशेष कार्यक्रमका साथ मनाइएको हो ।
-1780325221.jpeg)
कार्यक्रममा प्रधान सेनापति अशोक राज सिग्देलले मिसन इलाकामा वीरगति प्राप्त गर्ने २ जना सैनिकका परिवारलाई सम्मान पत्र र शान्ति स्थापनार्थ खटिई उत्कृष्ट कार्य गर्ने ५ जना सैनिकहरूलाई कदर पत्रसमेत प्रदान गर्नुभएको थियो ।
संयुक्त राष्ट्र संघको आव्हानमा सन् १९५८ बाट शान्ति सैनिक खटाउँदै आएको नेपाल, शान्ति सैनिक पठाउने राष्ट्रहरूको सूचिमा पहिलो स्थानमा रहेको छ ।
संयुक्त राष्ट्र संघीय मिसन अन्तर्गत हाल विश्वका विभिन्न ९ वटा मिसनहरूमा नेपाली सेनाका ४ हजार १ सय ७९ जना शान्ति सैनिकहरू कार्यरत छन्।
विश्व शान्ति स्थापनाको सिलसिलामा हालसम्म नेपाली सेनाका ७४ जना सैनिकहरूले वीरगति प्राप्त गरेका छन् भने ७७ जना सैनिकहरू घाइते भएको सैनिक जनसम्पर्क तथा सूचना निर्देशनालयले जनाएको छ ।
समारोहमा रक्षा सचिव, नेपाल प्रहरी, सशस्त्र प्रहरी बल नेपाल तथा राष्ट्रिय अनुसन्धान विभागका प्रमुख तथा पदाधिकारीहरू, स्थानीय जनप्रतिनिधिहरू, परराष्ट्र मन्त्रालयका पदाधिकारीहरू, काभ्रेपलान्चोक जिल्लाका प्रमुख जिल्ला अधिकारी, मित्रराष्ट्रहरूका सैनिक सहचारीहरू, सञ्चारकर्मीहरू लगायत नेपाली सेनाका रथीबृन्द, अधिकृत, पदिक तथा अन्यदर्जाको उपस्थिति रहेको थियो ।
प्रकाशित मिति: सोमबार, जेठ १८, २०८३
