काठमाडौँ । महिला तथा बालबालिकाको मानसिक स्वास्थ्य प्रवर्द्धन र हिंसा न्यूनीकरणका लागि विभिन्न धर्मका धार्मिक अगुवामार्फत सरकारले काम गर्न सके प्रभावकारी हुने सरोकारवालाहरूले बताएका छन् ।
महिला हिंसाविरुद्ध राष्ट्रिय अन्तरधार्मिक सञ्जाल (निरन) नेपालले ललितपुरमा गरेको कार्यक्रममा वक्ताहरूले यस्तो धारणा व्यक्त गरेका हुन् ।
हानिकारक परम्परागत अभ्यास अन्त्य गर्न धर्मगुरुहरूले खेलेको भूमिकाको प्रशंसा गर्दै निरनका उपाध्यक्ष तथा ओसोधाराका प्राचार्य डा. नर्मता पाण्डेले अब महिला हिंसा न्यूनीकरण र महिलाको मानसिक स्वास्थ्य प्रवर्द्धनमा केन्द्रित भएर काम गर्ने योजना रहेको बताउनुभयो ।
अन्तरधार्मिक गतिविधिमार्फत विभिन्न कार्यक्रम सञ्चालन गरी समाजमा रहेका कुरीति र कुसंस्कार अन्त्य गर्न सफल भएको उल्लेख गर्दै निरनका व्यवस्थापक नहिदा बानुले अब मानसिक स्वास्थ्य प्रवर्द्धनका लागि धर्मगुरुहरूलाई थप सक्रिय बनाउने योजना रहेको जानकारी दिनुभयो ।
इसाई धर्मका पास्टर रुविन पाख्रीनले धर्मका नाममा हुने कुरीति अन्त्य गर्दै मानव तथा परिवार कल्याणका लागि आफूहरू निरन्तर क्रियाशील रहने बताउनुभयो ।
कार्यक्रममा विभिन्न धर्मका संघ–संस्थाका नेतृत्ववर्ग, धर्मगुरु, धार्मिक अगुवा, सरकारी प्रतिनिधि तथा सरोकारवालाबीच छलफल भएको थियो ।
कार्यक्रममा सहभागी हुँदै मुस्लिम आयोगका कार्यबाहक अध्यक्ष महमुद्धिनी अलीले यस्तो अन्तरधार्मिक संवादबाट धेरै कुरा सिक्न पाएको बताउनुभयो ।
महिला आयोगका उपसचिव सीता अधिकारीले महिला हिंसा न्यूनीकरण तथा मानसिक स्वास्थ्य प्रवर्द्धनका क्षेत्रमा महिला आयोगले अन्तरधार्मिक संस्थासँग सहकार्य गर्ने बताउनुभयो ।
कार्यक्रममा वरिष्ठ पत्रकार तीर्थ कोइरालाले मानसिक स्वास्थ्य प्रवर्द्धन र महिला हिंसा अन्त्यका लागि सञ्चार माध्यम तथा सामाजिक सञ्जालको क्षमता अभिवृद्धि गर्न आवश्यक रहेको धारणा राख्नुभयो ।
समाजकल्याण परिषद्का निर्देशक भगवती सङ्ग्रौलाले समाजकल्याण तथा मानसिक स्वास्थ्यसँग सम्बन्धित गतिविधि सञ्चालन गर्ने संस्थाहरूसँग परिषद् सधैं सहकार्य गर्न तयार रहेको बताउनुभयो ।
प्रकाशित मिति: बुधबार, जेठ ६, २०८३
