भोटेकोशीको बाढीले केरुङमा अलपत्र परेका १ सय ८१ जना नेपालीलाई तातोपानी नाका हुँदै नेपाल ल्याइएको छ । गत असार २५ गते रसुवा स्थित भोटेकोशी बाढीले मितेरी पुल बगाएपछि केरुङमा होटल तथा पर्यटन क्षेत्रमा संलग्न नेपाली उतै अलपत्र परेका थिए । उनीहरूलाई नेपाल र चीन सरकार, स्थानीय प्रशासन र सरोकारवाला निकायको पहलमा तिब्बतको केरुङबाट न्यालम हुँदै सिन्धुपाल्चोकको तातोपानी नाकाबाट नेपाल ल्याइएको हो । केरुङमा विभिन्न पेशा गरी बसेका नेपालीहरू बिरामी पर्न थालेको र कतिपयले घर फर्कन नपाइएला भनि चिन्तितसमेत भएपछि नेपाल ल्याउने व्यवस्था गरिएको सिन्धुपाल्चोकका प्रमुख जिल्ला अधिकारी वन्धुप्रसाद बास्तोलाले जानकारी दिनुभयो । उहाँकाअनुसार नेपाल फर्कनेमध्ये अधिकांश रसुवा जिल्लाका रहेका छन् । सिन्धुपाल्चोक हिमालय सिमापार वाणिज्य सङ्घको सहयोगमा ५ वटा सवारीसाधन मार्फत उनीहरूलाई काठमाडौँ पठाइएको छ ।
प्रकाशित मिति: बिहीबार, साउन २९, २०८२
