जन्मदर्ता विवरण सच्याउन कानुनी रुपमा बाटो खुले पनि कार्यान्वयनमा जान केही समय लाग्ने भएको छ ।
सरकारले एकपटकका लागि जन्मदर्ता सच्याउन सकिने व्यवस्था सहित केही नेपाल ऐनलाई संशोधन गर्न बनेको ऐन २०८२ संसदबाट पारित गरि सकेको छ, जसलाई राष्ट्रपतिले प्रमाणीकरण समेत गरिसक्नु भएको छ ।
तर ऐन संसदबाट पारित भइ प्रमाणीकरण भईसकेको भए पनि कार्यान्वयनका लागि आवश्यक नियमावली निर्माणको प्रक्रिया भने बाँकी छ ।
राष्ट्रिय परिचयपत्र तथा पञ्जीकरण विभागका अनुसार नियमावली बनेपछि मात्र नागरिकहरूले आफ्नो जन्मदर्ता विवरण संशोधन गर्न सक्नेछन् । सीआईएनसँग कुरा गर्दै विभागको पञ्जीकरण शाखाका निर्देशक मुकेश कुमार केशरी हाल कार्यविधि बनाउने प्रकृया सुरु भएको तर बन्न कति समय लाग्छ यकिन भईनसकेको बताउनुभयो ।
राज्यले केही नेपाल ऐन संशोधन गर्दै अब व्यक्तिगत घटना विवरणहरू, जस्तै जन्मदर्ता, सच्याउन सक्ने कानुनी आधार तयार पारेको हो ।
यसअघिको व्यवस्थाअनुसार राष्ट्रिय परिचयपत्र तथ पञ्जिकरण ऐन २०७६ मा बालबालिकाको जन्मदर्ता एक वर्षभित्रमा सच्याउन मिल्ने व्यवस्था गरेको थियो । उक्त व्यवस्था पनि २०७६ सालभन्दा पछि जन्मिएका बच्चाहरूका हकमा मात्रै लागू थियो ।
प्रकाशित मिति: शुक्रबार, साउन २३, २०८२
