सिन्धुपाल्चोक । गएरातिदेखि आएको बाढीले सिन्धुपाल्चोकको रेडियो मेलम्चीको भवन भत्किएको छ । रेडियो मेलम्चीका अध्यक्ष डम्बर रसिक भारतीले गएराति १२ बजेर ४० मिनेटमा रेडियोको भवन भत्काएको जानकारी दिनुभयो ।
यसअघि गत असार १ गते आएको भीषण बाढीले हेलम्बुु, किउल र मेलम्ची बजारलाई बगरमा परिणत गरेको थियो । त्यतिबेला नै बाढीमा डुबे पनि रेडियो मेलम्चीको भवन भत्किएको थिएन ।
सुरक्षित स्थानमा सारेर वैकल्पिक माध्यमबाट रेडियो भने सञ्चालन गरिएको थियो । अध्यक्ष भारतीका अनुसार रातिको बाढीले पुर्याएको क्षतिको विस्तृत विवरण आउन बाँकी छ ।
मेलम्ची उर्लिरहेकाले थप क्षति हुनसक्ने भएकाले सचेत रहन जिल्ला प्रशासन कार्यालयले आग्रह गरेको छ ।
यसअघि हेलम्बु गाउँपालिका नाकोते खोलामा बाढी आएको भन्दै मेलम्ची खोला तटिए क्षेत्रका बासिन्दालाई हेलम्बु गाउँपालिका अध्यक्ष निमा ग्याल्जेन शेर्पाले गएराति नै सतर्क हुन अनुरोध गर्नु भएको थियो ।
खोलाबाट असार १ जतिकै आवाज आएको उहाँले बताउनुभयो । हेलम्बुस्थित चनौटेको रातो पुलमाथिबाट अहिले पनि पानी बगिरहेको स्थानिय हस्त पण्डितले जानकारी दिनु भएको छ ।
.jpg)
बाढीले धार परिवर्तन गरेर तालामाराङ प्रहरी चौकीको भान्छा पनि बगाएको छ ।
ग्यालथुममा रहेको एउटा झोलुङ्गे पुल पनि बाढीले बगाएको छ भने नदीको सतह बढेपछि ग्यालथुम बजारसमेत जोखिममा रहेको जिल्ला प्रहरी कार्यालय सिन्धुपाल्चोकका एसपी राजन अधिकारीले जानकारी दिनुभयो ।
प्रकाशित मिति: आइतबार, साउन १७, २०७८, ०७:१८
